[A:11a]ba bsam gyis mi khyab pa zhes bya'o// // ! gnyis pa des bstan pa rin po che'i sgrom bcas pa'i tshul ni/ sangs rgyas nas zhag bdun phrag dang po la ni ngas 'dir sdug bsngal mthar phyung ngo snyam nas skyil krung ma bshig par byang chub kyi bde ba bsten pa ni chos nyid de/ sangs rgyas stobs bcu mnga' ba rnams/ /gang du smon rdzogs dbang bskur ba'i/ /sa yi snying po zhag bdun du/ /rgyal ba'i skyil mo krung mi bshig /ces so/ /gnyis pa la byang chub kyi shing la gzigs shing / gsum pa rgya mtsho'i bar du 'chag bzhi pa stong gsum ring du 'chag lnga pa klu btang bzung gi drug pa shing nyA gro dha'i drung du kun tu rgyu dag la/ chos thos pa dang mthong ba bde/ /dben par dga' ba bde ba yin/ /nga rgyal nga rgyal gang 'dul ba/ /de ni bde ba yin sogs gsungs/ /bdun pa la shing sgrol rgyu'i drung du tshong pa ga gon dang bzang po'i spun gyis bsod snyoms phul ba na/ rgyal po bzhi las rdo'i lhung bzed bzhes te gcig tu byin gyis brlabs/ lha yi bkra shis don grub cing / /phyogs rnams bkra shis byed pa des/ /khyed la bde legs mdzad par 'gyur/ /zhes pa la sogs shis pa brjod pa gsungs te/ de gnyis sangs rgyas su lung bstan/ de nas 'di snyam du dgongs te/ zab zhi spros bral 'od gsal 'dus ma byas/ /bdud rtsi lta bu'i chos shig bdag gis rnyed/ /su la bstan kyang go bar mi 'gyur bas/ /mi smra nags 'dabs gnas par bya'o snyam/ /zhes dgongs shing / 'jig rten kun la snying brtse mtha' yas pa/ /gzhan gyis gsol ba btab la nga mi sdod/ /skye bo 'di kun tshangs la dad pa ste/ /de yis gsol ba btab na 'khor lo bskor/ /snyam ste 'od bkye bas/ stong gsum gyi bdag po tshangs pa gtsug phud can gyis shes nas grogs sbran te/ tshangs pa 'bum phrag drug cu rtsa brgyad dang bcas pas thal mo sbyar te/ ye shes chen po mchog gi dkyil 'khor bsgrubs nas ni/ /phyogs bcu kun tu 'od zer rnam par bkye mdzad de/ /ye shes zer gyis mi yi padmo kha 'byed pa/ /smra ba'i nyi ma de ring ci slad btang snyoms bzhugs/ /zhes pa la sogs pas bskul bas/ cang mi gsung bar gnang ste song ngo / /ston pa yang thugs las chung ba la gzhol ba dang / des brgya byin sbran te/ zla ba nya ba gza' las thar ba ltar/ /khyod kyi thugs ni rnam par grol ba lags/ /g.yul las rnam par rgyal ba bzhengs su gsol/ /'jig rten mun