[A:104a]pa'i dus la bab par gzigs nas/ dbo zla ba'i nya la nyi ma'i shing rta la sogs pa'i tshangs pa'i drang srong rnams la bka' nan chen po mgo bor rdo rje lhung ba ltar phab nas/ de dag gis ka lA pa'i grongs spangs te 'phags pa'i yul du don phyin no/ /nyi ma bcu bgrod pa'i mtha' la nags tshal thibs por zhugs pa na/ rgyal po grags pas ji ltar tshangs pa'i drang srong 'di dag 'phags pa'i yul du song na grong bye ba phrag dgu bcu rtsa drug na gnas pa'i sems can mi bzad pa'i sems dang ldan par 'gyur te/ 'dir rdo rje theg par gsungs pa yang dag pa'i ye shes kyi lam ma yin pa'i rgyu des/ drang srong thar pa don du gnyer ba 'di dag thams cad dpal rgyal po grags pa'i 'jigs pas gnas yongs su btang ste rang gi gnyen bshes bzung nas 'phags pa'i yul du song ngo / /zhes rgyal rigs la sogs pa'i skye bo rnams sems par byed cing skal ba ngan par gyur te/ zab pa dang rgya che ba'i chos kyi sgo la sems legs pa dang mi ldan pa'i phyir ro snyam dgongs nas/ khyab 'jug dang / tshangs pa dang / drag po'i rigs thams cad rmongs par byed pa zhes bya ba'i ting nge 'dzin la snyoms par zhugs so/ /ting nge 'dzin dang lha'i byin rlabs de'i stobs kyis drang srong de dag nags tshal du rmongs nas/ der gnas pa'i ri khrod pa dag gis bcings nas rgyal po grags pa'i 'dun sar dor ba dang / sad nas ci bdag cag nags tshal chen po nas slar dkyil 'khor gyi khang pa 'dir sleb par gyur snyam ca cor bsgrags pa mi'i bdag po grags pa'i blon po sprul pa'i sku rgya mtsho'i blo gros kyis thos te smras pa/ kye nyi ma'i shing rta la sogs pa'i drang srong rnams rgyal po grags pa 'di ni phyogs gcig pa ma yin te/ khyed rnams rjes su gzung ba'i don du sangs rgyas kyi byin rlabs kyis byung ba'i byang chub sems dpa' chen po su zhig go /de'i phyir 'di'i zhabs la skyabs su song la/ rgyud kyi rgyal po dang po'i sangs rgyas la 'jig rten dang 'jig rten las 'das pa'i dngos grub sgrub pa'i lam dbang bskur bar gsol ba thob cig ces bsgo'o/ /rgya mtsho'i blo gros kyi tshig de dang