[A:25]mjal res gsung ba'i tshul/ rong ston gyi nye gnas nam mkha' dpal ldan pas shel rong ljangs pa/ 'phan yul gyi ja yul gzhis ka ba sogs sbyin bdag yongs la bskyar bas/ so so nas dad mos 'khrungs/ rje 'di nyid kyi phrin las sgo 'byed pa'i rten 'brel du yang byung ces drin can spyang lung pa'i bka' las thos shing/ zur tsam rnam thar rdor rgyal mar yang bris so//
der rje nyid dgung lo bcu gsum bzhes pa lcags pho spre'u'i lo gsar tsam la rje rong ston chen po'i bkas sngar sne pa'i dgag dgos blta phyir bar dge tsam la bzhag pa yin/ da ni tshig snga ma dge tshul gyi brtul zhugs legs par long zhes gsungs nas bka' drin du mdzad cing/ mtshan sngar gyi mthar dri med legs pa'i blo gros gnang ba yin zhes drung yig chos rgyan las brgyud pa'i ngag sgros so//
sngon nas 'dris pa'i gdung ba'i dad pa'i shugs//
dri ldan pad mtshor bung ba rjes snyog 'dra//
chos don sbrang rtsi len 'dod rkang drug pa//
mos dge'i 'dab gshog rab tu g.yo ba nyid//
g.yag rong rnam thar snyan tshig dbyar skyes rnga//
thos pas yid myos gus pa'i gtsug phud can//
rab dga'i spu long rgya cher g.yos pa las//
'gyur med dad pa'i bro gar yang yang rtses//
char sdod bye'us 'brug sgra rjes thos ltar//
shAkya'i rgyal mtshan mtshan thos yid mgu zhing//
rtag tu ngu de chos 'phags la chags yid//
dus der gang gi thugs mtshor gsal bar 'phos//
chags ldan yid dbang 'dren pa'i lang tsho ma//
dus btab ngal bas yid dbang skyo ba ltar//
rong ston zhal bzang la sred dam pa'i spyan//
yang yang 'gyur bar mdzad pa rjes 'brel tshul//
mkhas mang rgyu skar bye bas mi dpogs pa'i//
rong ston smra ba'i zla bar mngon phyogs pa//
khyod blo dad pa'i ku mud gsar pa'i tshal//
gdung shugs 'dab brgya'i ge sar rgod pa snyam//
zhes paNDi ta chen po shAkya mchog