[A:101]pa'o// zhes rjes su rtogs so//
mkhas pa'i spyan sngar yid dbang 'dren byed ni//
lang tshos ma lags rigs gzugs 'byor pas min//
yon tan rgyan phreng gsal ba'i gzi 'od de//
gang la mnga' ba dpyod ldan shes par byos//
skye bar sbyangs pas shes bya'i gnas kun la//
'bad pa chung ngus mkhyen rtogs cher 'khrungs pa//
rang nor bcol po len dpe ji lta'i tshul//
yud kyis mkhas pa'i 'gran bral go 'phang brnyes//
shul rings 'phags pa'i yul byon paNDi ta//
rang tshig gzugs kyis tshim tshe brjod bral bas//
lkugs pa'i rmi lam ji lta'i ngang nyid du//
zhag mangs ngal ba'i khur gyis gnon bzhin bzhugs//
de tshe phyogs bcur bsngags pa'i bya ma rta//
phrin yig mgul thogs 'dab chags bu tshol ltar//
sa mtha' yongs su nyul yang mun pa'i rum//
gangs khrod rang gi de nyid gsal bar byas//
cher khros sbrul gdug gnas pa'i khang logs su//
nor bu rab dngas 'od snang gsal min ltar//
skad gnyis smra mkhas de ni mdun bzhag nas//
glang rdzi yongs la shes sam brda sbyor dris//
slad nas mdzangs grung ldan pa'i kha lo pas//
snyan ljebs shing rtas drangs pa'i bkra shis tshig//
legs bsgyur ngo mtshar dad pa'i shar ri'i rtser//
smra mkhas nyin byed gzhon nu gsal bar shar//
paNDi ta de'i yid kyi padmo'i tshal//
rab rgyas phyur mthong che dgu'i bung ba'i tshogs//
bdag nyid che de'i zhabs rten gding ba'i gos//
len par brtson la gshog rtse g.yo ba 'dra//
bslab sbyangs yon tan rtsi sman mchog de yis//
sdug sems sdang ba'i zug rngu'i tshogs bkrus nas//
yid ngor mdzes pa'i mig zur dkyus ring dag//
snying nas chags pas yun du blta bar byas//