[A:597]zhag bcu dgu'i bar du rgyun ma chad par mdzad/ de'i tshe stod hor gyi rgyal po tho lug the mur gyi gdan 'dren byung ba la 'byon par ma gnang / kam chu'i zhing du nad yams chen po byung bas gzhan rnams su byung gis dogs nas bred pa la/ gu'i gung bas nad yams bzlogs par zhus pas/ 'o na nga'i gnyid ma skrog cig gsung nas re shig mnal ba ltar mdzad/ de nas khang pa'i steng du babs pas sdigs chom de byung ba yin/ da nad rnying pa zhi zhig sar pa mi 'ong gsung / de nas btsong kha dang be ri'i sa char phebs/ de rnams su 'bul ba byung ba thams cad dbus gtsang gi chos sde dge 'dun bcur longs yod pa yan chad du mang ja bdun bdun/ 'bul ba rnam bzhag dang bcas pa sgrub pa la bla ma ri bo sgang ba btang nas/ bstan pa la zhabs tog mdzad/ jo bo'i drung du dngul bre chen bcu gcig las rdungs pa'i skong bu/ 'tshur phu'i lha chen la gser bre chen lnga la brdungs pa'i gser shog dang / dngul bre sum cu rtsa gcig la brdungs pa'i skong bu lnga/ dge 'dun sgang pa la dngul bre gsum gyi skong bu/ bde chen du dngul bre gsum gyi skong bu la sogs pa dang / gzhan yang kar ma'i gdan sa la sogs pa'i mdo khams kyi gtsug lag khang rnams su dngul skong dang / rgyun 'bar gyi skong rgyags la sogs pa dpag tu med pa btsugs/ btsun