[A:570]dang / gzhu 'tshur gyi bar 'di dgon pa 'debs pa dang / dwags lha sgam por gser gyi glegs bam brgya 'bul ba dang / bla ma zhang gi 'khrug pa la mi rnams mi dga' bar 'dug pas/
khong la 'khrug pa mi mdzad pa'i zhu ba 'bul ba rnams la 'ongs pa yin gsung / zhang la 'khrug pa mi mdzad par zhus pas/ zhang gis phyag mdzub la 'jus nas bro mang du brdungs nas de phyin chad 'khrug pa ma mdzad/ 'tshur phur dgon pa yang btab/ de nas sku 'da' khar 'khor ba bgres pa rnams la dngos po mang du yod pa rnams kyis dkon mchog gi rten dang dge 'dun la bsnyen bkur gyis gsung ba'i zhal bkod gnang nas/ chu mo glang gi lo brgyad cu rtsa bzhi bzhes pa la mkha' 'gro ma mang pos bsu ba mdzad de gshegs/ ngo mtshar ba'i ltas kyang du ma zhig byung ste rgyas par ma spros so/ /
de'i slob ma sangs rgyas ras chen ni/ gdung rus gru gu/ yul yar klungs su yab gtsang ba dpal grags dang / yum btsun chung ma bya ba'i sras su 'khrungs nas/ byis pa'i dus nas gar 'byon du 'ja'i gur 'ong ba dang / mkha' 'gro ma gser gyi rgyan can bzhi rjes su 'brang ba yod/ lo dgu bzhes pa'i tshe zangs ri ras pa'i sar byon nas ras chung pa las byung ba'i gdams pa rnams gsan pas/ bde gsal mi rtog pa'i nyams khor yug tu shar/ na bza' ras rkyang du mdzad pa'i ras chen du grags/ bco lnga bzhes pa gdams pa cung ma tshar ba la zangs ri pa sku gshegs/