[A:568]tsha bre lnga bsnams nas mon gyi rgyal po ga thung gi sar byon/ des yon bdag byas nas sha 'ug stag sgor byon nas bzhugs/ 'khor 'das dbyer med kyi rtogs pa brnyes/ de nas sgam por byon nas lo gcig bzhugs/ de nas gnang ba zhus nas rgyal khams skor du byon te sba gror byon/ de nas las stod na sa phug cig na mi la'i dngos slob dge tshul sku mched gnyis 'dug pa la'ang gdams pa zhus/ de nas 'phan yul bya bzang gi brag la dbyar dgun gsum bzhugs/ brag la thogs pa med pa'i mngon shes rdzu 'phrul bstan pas bla ma brag par grags/ yang gangs dkar la song gsung nas gangs dkar du byon/ padma'i bzhugs gnas pha bong dkar leb tu zla ba bzhi bzhugs te mkha' 'gro mas 'tsho ba drangs/ de nas snye mo'i 'phrang na mar byon pas mkha' 'gro mas nang du khrid 'tsho ba drangs/ de la brten nas ting nge 'dzin dpag tu med pa skyes/ de nas gzhu snye'i bar rdzong bya ba'i dgon pa na/ nA ro ba'i dngos slob cig bzhugs pa dang mjal/ mngon par shes pa mang du gsungs/ phyag chen thog babs dang thabs lam gyi man ngag mang du zhus/ bla ma lha rje ci gsung gyis gsung pa'i zhal brda'ang mang du gnang / de nas lha ri rgyan po dang jug por yang byon/ g.yag sde dang 'phan yul rnams su byon/ de nas gru bzhi dgon du bzhugs/ de nas sgam por byon pas rdzong ba'i spyan sngar byon pa sogs thams cad tshur la gsung / der dbyar thog gcig bzhugs/