[A:422]
byams chos btsan lugs kyi skabs/
bcom ldan 'das byams pa'i chos lnga po 'di la/ lo tsA ba chen po blo ldan shes rab dang btsan kha bo che gnyis gsan sa'i bla ma sadzdza nar gcig kyang / gzhung gi bshad pa'i tshul ni mi 'dra bar snang ste/ de yang btsan lugs kyi lo rgyus la/ theg pa chen po rgyud bla ma dang chos chos nyid rnam par 'byed pa gnyis panTi ta gzhan la yang ma grags/ rje me tri bas mchod rten zhig gi ser kha nas 'od 'byung gi 'dug pa gzigs pas chos gnyis po'i dpe byung / de nas rje btsun ma pham pa la gsol ba btab pas sprin gyi mthongs su byon te/ de gnyis legs par gnang / mee tri bas panTi ta dga' ba'i grags pa zhes bya ba la bshad/ dga' ba'i grags pas sprang po'i cha byad kyis kha cher byon/ sa dzdza nas dga' ba'i grags pa ngo mtshar can du gzigs te bsnyen bkur nas gzhung gnyis po'i bshad pa zhus shing / dpe yang kha yar bris nas mkhas pa dznyA na shrI la sogs pa la phul/ de yang btsan kha bo che de grwa pa mngon shes kyi mkhan bu yin pas/ kha cher 'byon khar mkhan po la gtor ma zhus pas/ mkhan po'i zhal nas khyod kha che nas ma 'khor bar la so na ba tsam yang mi yong bar ngas khag khur cig gsung nas/ lcags mo bya lo pa lo lnga bcu rtsa drug bzhes pa zhig kha cher phyin pa yin pas/ sadzdza na la/ da nga rgas pas chos mang po mi