[A:417]legs par bsgyur ba'i/ zhes bya ba la sogs pa gsungs shing 'gyur bcos yang dag pa zhig mdzad/ 'dus pa'i skor gyi phran mang po yang bsgyur zhing / 'dus pa'i 'chad nyan kyang mdzad/ slob ma rnams kyi nang nas gtsang pa sar spos/ rma bya byang chub ye shes/ dar yon tan grags/ zhang thang sag pa ye shes 'byung gnas rnams la spa tshab kyi bu bzhi zhes grags/ de rnams la brten nas dbus gtsang du dbu ma'i bshad pa dang / bye brag tu slob dpon phywa pa'i seng chen rma bya byang brtson gyis spa tshab la dbu ma dang 'dus pa gnyis ka gsan te/ yar klungs kyi stod smad du chos gzhi spos shing dbu ma'i bshad pa yun ring du mdzad/ btsan thang ba rgyal ba dpal la sogs pa'i slob ma mang po byung zhing dbu ma shin tu dar bar mdzad/ rma bya byang brtson nu khu lo tsA ba mdo sde 'bar dang / kha che dza ya A nanda gnyis ka'i slob ma ste/ dza ya A nandas mdzad pa'i rtog ge tho ba la yang TI ka mdzad/ rtsa ba shes rab kyi TI ka tshig gsal gyi stong thun la TI ka 'jug 'grel gyi bsdus don dang mchan/ dbu ma'i bsdus pa mdzad pa rnams ni mthong / gzhan yang dbu ma'i skor la yig cha mang du mdzad pa 'dra'o/ /
zhang thang sag pas ni/ thang sag btab nas dbu ma'i 'chad nyan legs par mdzad de/ khong gis mdzad pa'i 'jug pa'i TI ka rigs pa drug cu pa'i TI ka/ bzhi brgya pa'i TI ka rin chen phreng ba'i TI ka