[A:413]grwa sa ni gsang phu ba yin/ der bu TI ka la mang du sbyangs/ thugs la bka' bstan bcos kyis gtso byas pa'i gsung rab bzhugs pa khong las mang ba med ces grags pa des/ sa skya dga' ldan gyi bdag po mdzad/ dbus gtsang yar mar du bshad nyan mdzad pas pha rol tu phyin pa'i bstan pa shin tu dar ba mdzad de/ pha rol du phyin pa la TI ka yang rab 'bring mang po brtsams/ rnam 'grel dang dbu ma la sogs pa'i bshad pa yang mdzad de/ mthar gdung sbyangs pa na lha sku dang ring bsrel 'ba' zhig tu gyur/ de'i thugs kyi sras rong ston smra ba'i seng ge chen po ni/ rgyal mo rong nas gzhon nu la gsang phu ne'u thog tu phebs/ brtson pa dang skal ba gnyis ka phun sum tshogs pas dgung lo nyi shu tsam bzhes pa na/ bstan bcos chen po la TI ka bya bar nus pa'i dge bshes chen por gyur/ dbus dang las stod phyin gyi sa stod smad rnams su chos par mdzad cing / bshad pa rgya chen po mdzad pa la brten nas mkhas pa'i slob ma mang du byung la/ 'grel pa don gsal la TI ka mdzad pa dang / 'bum la yang 'bum TIka chen mo mdzad pa la sogs pas bstan pa'i bya ba rgya cher mdzad de/ phyi ma'i dus su 'chad nyan gyis phan btags pa rnams kyi mchog yin no/ /de'i slob ma chos smra ba chen po sangs rgyas 'phel gyis rin spungs pas sbyin bdag mdzad nas/ 'bras yul du chos grwa bskyangs pas kyang blo gsal mang po'i mig phye ste/ bstan pa gsal bar byas so/ /