[A:406]gtsang ba 'jam dpal seng ge zer/ 'khon jo sras rtse mo/ rngog jo sras ra mo/ khu jo sras ne tso/ gnyos jo sras dpal le dang bzhi la jo sras bzhi zer/ 'gar dbang grub/ kong po 'jag chung / lho ba sgog zan/ bar phu ba dang bzhi la shes rab can bzhi zer/ gzhan yang 'jad pa ston skyabs dang / rdo rje 'od zer la sogs dang / dus gsum mkhyen pa dang / zhang 'tshal ba la sogs pa mang du byon no/ /de dag las gtsang nag pa ni/ rje btsun 'jam dpal gyi bsnyen pas blo rno zhing shin tu mkhas pa/ dbu tshad la sogs pa yig cha mang du mdzad de/ tshad ma rnam nges la TIka chen zhig dang / shes rab kyi pha rol tu phyin pa'i mdo sbyor dang / bslab btus dang spyod 'jug dang / dbu ma'i bstan bcos rnams la'ang rnam bshad mang du brtsams/ slob dpon phywa bas slob dpon zla ba grags pa la dgag pa mang du mdzad pa la/ gtsang nag pas ni/ dpal ldan zla ba grags pa'i gzhung lugs la/ sbyangs pa'i stobs kyis gzhung don nges gyur pa/ nga 'dra'i skye bo slad chad 'byung mi 'gyur/ gsung nas/ dbu ma'i bsdus pa'ang che phra mang du mdzad pa rnams zla ba grags pa'i lugs yin/ rma bya byang chub brtson 'grus ni/ lung dang tshad ma la yang shin tu mkhas mod kyi/ dbu ma la brten nas gzhan phan mang du mdzad cing / rtsa ba shes rab dang tshig gsal stong thun gyi TI ka dbu ma'i bsdus pa dang / rtog ge tho ba'i TI ka 'ang mdzad de/ 'di yang