[A:402]kun dga' dbang phyug lo bcu gsum/ de nas da lta'i rin chen byang chub pa 'di'o/ /lo tsA ba 'khrungs nas me pho spre'u 'di yan la lo bzhi brgya dang bco brgyad song ngo / /lo tsA ba'i slob ma'i mchog che ba 'bre shes rab 'bar gyis skyegs gnas rnying dang / gzhan rnams su'ang chos gzhi bskor zhing / shes rab kyi pha rol tu phyin pa'i mdo dang bstan bcos gnyis ka la bshad pa rgya cher mdzad/ chos bshad pa'i dus su lha rnams chos nyan du 'ong bar yang grags/ khong gi bshad pa de ni bstan pa snga dar gyi pha rol tu phyin pa'i bshad rgyun khams su 'phos pa las byung ba yin/ slob ma shin tu mang na'ang / bshad pa'i rgyun gyi gtso bo ar byang chub ye shes kyi gzung / 'dis gnam rtse ldang la sogs par sku shin tu bgres par gyur tshun chad du bshad pa mdzad cing / skabs shed du ni rgyal lha khang gi gdan sa yang mdzad/ pha rol tu phyin pa'i mdo bstan bcos kyi rnam par bshad pa yang mang du mdzad/ bod kyi pha rol du phyin pa'i gzhung 'chad pa phal che ba ni 'bre ar gyi bshad pa la brten par snang / khu sher brtson gyis 'bre la'ang sleb mod/ mngon rtogs rgyan 'grel pa dang bcas pa'i TI ka che 'bring chung gsum brtsams pa rnams kyang ar gyi lugs gtso che bar snang zhing / skar chung ring mor grags pa mtshan gzhon nu tshul khrims bya ba des kyang ar la bslabs nas/ mngon rtogs rgyan 'grel chung dang bcas pa dang / sdud pa la sogs pa'i TI ka mang du mdzad/ khu dang skar chung