[A:602]ཤིན་ཏུ་འཇིགས་ནས་དགེ་སྦྱོར་ལ་འབད་པས་དགེ་སྦྱོར་ཁྱད་པར་དུ་གྱུར་པ་སྐྱེས་པ་སོགས་ངོ་མཚར་བའི་མཛད་པ་གྲངས་མེད་པ་བསྟན། གཞན་ལ་ཆོས་གསུང་བ་དང༌། འབུལ་བ་བཞེས་པ་དང༌། ཞལ་སྟོན་པ་དང༌། ཁྲིམས་ལ་སོགས་པས་ཡང་དག་པའི་ལམ་ལ་བཀོད་དོ། །དེའི་དུས་སུ་གོང་མ་རྒྱལ་པོའི་གདན་འདྲེན་གྱིས་དབུས་སུ་སླེབས་པས་ཉི་མ་དབུས་ཀྱི་རྒྱལ་ཁམས་སུ་རིམ་གྱིས་ཕེབས་ཏེ། ལྷ་ས་དང་འཚུར་ཕུར་ཕེབས་ནས་གསེར་ཡིག་པའི་ཞུ་བ་གོང་མའི་ལུང་ལ་སོགས་པ་བཞེས། དེ་ནས་རིམ་གྱིས་ཁམས་ཀྱི་སའི་ཆ་རྣམས་སུ་གཞན་གྱི་དོན་སྐྱོང་ཞིང་གོང་དུ་ཐེགས། དེའི་དུས་སུ་རྒྱའི་ཡུལ་འོད་ཀྱིས་ཁེངས་པ་དང༌། གཟིམས་ཁང་ལ་འཇའི་ཀ་བ་ཟུག་པ། སྤྲིན་གྱི་གསེབ་ཏུ་སངས་རྒྱས་དང་བྱང་ཆུབ་སེམས་དཔའ་རྣམས་མངོན་སུམ་དུ་བྱོན་པ་དང༌། ལྷའི་བུ་དང་བུ་མོ་རྣམས་ཀྱིས་ནམ་མཁའ་ནས་མངོན་སུམ་དུ་མཆོད་པ་འབུལ་བ་ལ་སོགས་པའི་རྫུ་འཕྲུལ་དང་ངོ་མཚར་བའི་ལྟས་དཔག་ཏུ་མེད་པ་བསྟན་པས། རྒྱལ་པོ་ཆེན་པོ་འཁོར་དང་བཅས་པ་དད་པ་ལྷག་པར་སྤེལ་ནས་ཡང་དག་པའི་ལམ་ལ་བཀོད། གོང་ནས་མཚན་དེ་བཞིན་གཤེགས་པར་གསོལ།
སངས་རྒྱས་དང་བྱང་ཆུབ་སེམས་དཔའ་དང༌། ཡི་དམ། ཆོས་སྐྱོང་གི་སྣང་བ་གྲངས་མེད་པ་གཟིགས་ཤིང༌། དེ་དག་གི་སྒྲུབ་ཐབས་ལ་སོགས་ཀྱང་མང་དུ་གནང༌། སྤྱིར་མཆོག་ཏུ་གྱུར་པའི་མཛད་པ་ངོ་མཚར་ཅན་ཕུལ་དུ་བྱུང་བ་བརྒྱ་རྩ་བརྒྱད་མཛད་ནས། གདུལ་བྱ་རྣམས་ཡང་དག་པའི་ལམ་ལ་བཀོད་ཅེས་ཟེར། གོང་མ་རྒྱལ་པོས་ཀྱང་དངུལ་རྐྱང་