[A:594]ནད་དར་བ་ལ་དེ་ནས་ལོ་མང་པོར་ལྷོག་ནད་ཞི་བར་མཛད།
དེ་ནས་ག་ཆུར་ཕེབས་པའི་ཚེ་ཡང་གོང་མའི་གདན་འདྲེན་བྱུང་ནའང་དུས་ཁམས་ཀྱི་འགྱུར་བཟློག་འོང་བར་དགོངས་ནས། ཚ་འཕྲང་ནག་པོའི་ཡུལ་བརྒྱུད་དེ་མི་ཉག་རབ་སྒང་དུ་བྱོན། སྒོ་ལྡོང་གི་འཁྲུག་གདུམས་ལོ་ཉི་ཤུ་རྩ་ལྔའི་བར་དུ་མཛད། འང་འགའ་བོའི་རི་ལ་བཞུགས་པའི་དུས་སུ་གོང་ནས་ལོང་དང་གནང་སྦྱིན་རྒྱ་ཆེན་པོ་ཤེས་རབ་ཧུ་ཤྲི་ལ་སོགས་པའི་མི་དཔོན་མང་པོས་གདན་དྲངས་ཏེ་མདོ་སྨད་དུ་ཕེབས་པ་ལ། འཇམ་དབྱངས་གུ་ཤྲིས་འཇྭ་ས་ཕུལ་བའི་འཇྭ་སའི་ནང་དུ། ངེད་དང་སེམས་ཅན་མང་པོ་ལ་ཕན་པའི་ཕྱིར་ཅི་ནས་ཀྱང་འབྱོན་པ་སློབ་དཔོན་ཆེན་པོ་རོལ་པའི་རྡོ་རྗེ་མཁྱེན། ཞེས་པ་ལ་སོགས་བྱུང་མ་ཐག་ཏུ་རབ་སྒང་ནས་བཏེག དེ་ནས་ཤིང་ཀུན་མཁར་དུ་ཕེབས། དེའི་མཁན་པོ་དཔལ་ལྡན་མཆོག་གིས་ཐོག་དྲངས་སྐྱེ་བོ་གྲངས་མེད་པ་ཐར་པ་ལ་བཙུད། དེ་ནས་ས་པཎ་གྱི་བཞུགས་གནས་སྤྲུལ་པའི་སྡེར་ཕེབས། སྐད་རིགས་མི་གཅིག་པའི་མི་མང་དུ་འདུས་པ་ལ། བཞུགས་ཁྲིའི་གཡས་སུ་ཧོར་དང་ཡུ་གུར་གྱི་ལོ་ཙཱ་བ་དང༌། གཡོན་དུ་མི་ཉག་དང་རྒྱའི་ལོ་ཙཱ་བ་བཀོད་ནས། ལོ་ཙཱ་རྣམས་སོ་སོར་བསྒྱུར་ཏེ། གདུལ་བྱ་རྣམས་ཀྱིས་གསུང་གཅིག་ཐམས་ཅད་དུ་གོ་བར་མཛད། དེ་ནས་ལྕགས་ཕོ་བྱི་བ་ལོ་ལ་ཏའི་ཏུར་ཕེབས། རྒྱལ་པོ་འཁོར་དང་བཅས་པ་ཞལ་མཐོང་གསུང་ཐོས་པ་ཙམ་གྱིས་རབ་ཏུ་དད་པར་མཛད། ཁྱད་པར་རྒྱལ་པོ་ཡབ་སྲས་ལ་རྣལ་འབྱོར་མའི་དབང་དང༌། ཐབས་ལམ་ནཱ་རོའི་ཆོས་དྲུག་ལ་སོགས་པ་