[A:588]བླ་མ་དེ་སྡིག་སྤྱོད་མང་བས་ལན་པ་ཡིན་གསུང༌། དྲུང་ནས་བདེ་བར་གཤེགས་པའི་དུས་སུ་ཟླ་བའི་ནང་ན་བཞུགས་པ་མི་མང་པོས་མཐོང་ཟེར་བ། ཟླ་བ་ལ་བཞུགས་པ་ལགས་སམ་ཞུས་པས། དེ་ཁོང་རང་རྣམས་ཀྱི་དད་པ་དང་ངའི་སྙིང་རྗེ་ལ་བརྟེན་ནས་མཐོང་བ་ཡིན། ང་ལ་ཁོང་རྣམས་བལྟས་ནས་འདི་ཙུག་བྱེད་ཅིང་འདུག་གསུང་ནས་ཧོར་རྣམས་ཀྱི་ལུས་ཀྱི་རྣམ་འགྱུར་གྱི་ལད་མོ་ཡང་མཛད། དེ་ནས་བཞུགས་སྟན་ལ་བཞུགས་ནས། ཟླ་བ་དང་གླང་པོ་ཆེ་དང་སེང་གེ་ལ་སོགས་པ་ལ་འདུག་པ་ཡང་ང་ཡིན་གསུང༌། དྲུང་ནས་ཞི་བར་གཤེགས་པའི་བཅུ་བཞིའི་ཐོ་རངས་རྟོགས་ལྡན་གྲགས་སེང་བའི་གཟིགས་སྣང་ལ། དྲུང་ནས་རས་དཀར་པོའི་ཨང་རག་བསྣམས་ནས་འཇའ་འོད་ཀྱི་ནང་ན་ནམ་མཁའ་ལ་བཞུགས་པ་མཐོང་བ་ལ། ཁོང་གིས་དྲུང་ནས་ངེད་བུ་སློབ་ལ་མི་གཟིགས་པར་བདེ་བར་གཤེགས་པ་ཇི་ལྟར་ལ་བཞུགས་པས། ང་ལ་བསམ་པ་བཟང་པོ་ཡོད་ཀྱང་སྙིགས་དུས་སེམས་ཅན་གྱི་བསོད་ནམས་ལ་མི་འགྲུབ་པར་འདུག སྡིག་སྤྱོད་གྲངས་མང་བས་སྐྱོ་བ་སྐྱེས་པ་ཡིན། ང་དགའ་ལྡན་དུ་འགྲོ་གསུང་བ་ཅིག་ཁོང་གི་དག་སྣང་ལ་བྱུང་འདུག་པ། དྲུང་ནས་དེ་སྐད་གསུངས་པ་ལགས་སམ་ཞུས་པས། དེ་ལྟར་ཡིན་མོད་དེ་སྐྱོ་བ་སྐྱེས་ནས་ཕྱིན་པ་ཡིན། གཞན་ཡང་ཅང་ཤེས་ཀྱི་རྟ་དང་བྱ་རྒོད་ལ་སོགས་པའི་སྤྲུལ་སྒྱུར་མང་པོ་བྱེད་ཅིང་ཕྱིན། ལར་དགའ་ལྡན་དེ་ཐག་རིང་པ་ན་མེད་གསུང༌། དེ་ནས་གཞན་དག་ཡིད་ཆེས་པར་བྱ་བའི་ཕྱིར་ཅོ་འདྲི་བ་འགའ་ཞིག་ཞུས་ཏེ། ཆད་ཞུས་ནས་བཞེས་པར་ཞུ།