[A:583]རིན་ཆེན་ལ་གསང་འདུས་འཕགས་སྐོར་ལ་སོགས་གསར་རྙིང་མང་དུ་གསན། གཞོན་ནུ་འབུམ་ལ་བསྟན་བསྲུངས་ཀྱི་བཀའ་མང་པོ་དང༌། རོ་སྙོམས་དང་ཐུབ་ལྔ་ལ་སོགས་གསན། ཛྙཱ་ན་ཤྲཱི་ལ་འགྲེལ་པ་མཐའ་དྲུག་ལ་སོགས་གསན། རིག་འཛིན་ཀུ་མཱ་ར་རཱ་ཛ་ལ་རྫོགས་ཆེན་སྙིང་ཐིག་ཕྲན་དང་བཅས་པ་དང་ནེ་གུ་ལ་སོགས་པ་གསན་ཞིང༌། རི་ཁོང་རས་པ་ལས་ཀྱང་གསན། དེ་ནས་སྒམ་པོ་དང་ཀོང་པོར་བྱོན་ནས་གཞན་དོན་དུ་མ་མཛད། ཙཱ་རི་གཡུ་མཚོ་ར་ཡང་ཐེགས། སྤྱིར་ཀོང་པོར་ལོ་གསུམ་བཞུགས། ཤམྦུའི་གངས་ཀྱི་མདུན་དུ་ཕྱི་ནང་གི་རྟེན་འབྲེལ་དུ་མ་ཤར། དེ་ནས་ཇོ་མོ་གངས་སུ་བཞུགས་པ་ན་སློབ་དཔོན་པདྨའི་སྣང་བ་ཤར་ཞིང་བྱིན་གྱིས་བརླབས། འཚུར་ཕུའི་ཀུངས་ན་བཞུགས་པའི་ཚེ་ཕྱི་ནང་གི་གཟའ་སྐར་མཐུན་པར་གཟིགས་པས་རྩིས་ཀྱི་བསྟན་བཅོས་མཛད། དེ་ནས་ཡང་བདེ་ཆེན་སྟེངས་ཀྱི་དགོན་པ་བཏབ། དེར་དག་སྣང་མང་དུ་ཤར། ཁ་རག་ཤར་གྱི་རི་ཁྲོད་སྙིང་ཁུང་ལ་སོགས་སུ་བྱོན་སར་ཡང་དག་སྣང་མང་དུ་ཤར། སླར་ཡང་བདེ་ཆེན་སྟེངས་སུ་ཕྱི་ནང་གི་རྟེན་འབྲེལ་དག་པར་གཟིགས་པས་ཟབ་མོ་ནང་དོན་གྱི་བསྟན་བཅོས་མཛད། ས་སྐྱ་དང༌། བཙན་བྲག་དང༌། མྱང་སྟོད་ལ་སོགས་པ་གཙང་གི་ས་ཕྱོགས་མང་དུ་ཐེགས་ནས་གཞན་དོན་རྒྱ་ཆེར་མཛད། སླར་ཡང་ཀོང་པོར་བྱོན་ནས་དགོན་གནས་མང་པོ་མཛད་ཅིང༌།
གདུལ་བྱ་མང་པོ་ཐར་པ་ལ་བཀོད་ཅིང་ནགས་ཕུ་ལ་སོགས་པར་བཞུགས། ལྐོག་ཕྲེང་དུ་བཞུགས་པའི་ཚེ་ཟབ་མོ་ནང་དོན་གྱི་འགྲེལ་པ་བརྩམས། སྟག་