[A:566]པ་བཞུགས་པ་དང་མཇལ། སློབ་དཔོན་སྒོམ་པ་ལ་གདན་བཞི་གསན་ཞིང་སྒྲོལ་མ་དཀར་མོ་ཞལ་གཟིགས། དེ་ནས་སྒམ་པོར་བྱོན་ནས་ཆོས་རྗེ་ཁུ་དབོན་དང་མཇལ། དར་ལ་སོགས་པའི་མེ་ཏོག་ཕུལ་ནས་གདམས་པ་ཞུས་པས། བཀའ་གདམས་ཀྱི་ལམ་རིམ་ཅིག་གསུངས་ནས། ངས་ཀྱང་འདི་བསྒོམས་པས་ཁྱོད་རང་ཡང་འདི་བསྒོམས་གསུང༌། ཞུ་སྣ་དང་བདག་གཉེར་ཐམས་ཅད་སློབ་དཔོན་སྒོམ་པས་མཛད། དེ་ནས་རེ་ཞིག་ན་ཆོས་རྗེ་ལ་དབང་བསྐུར་ཞུས། ཐབས་ལམ་གྱི་གདམས་ངག་གནང་ནས་བསྒོམས་པས་ཞག་དགུ་ནས་བཙན་ཐབས་སུ་བདེ་དྲོད་འབར་ཏེ། རས་གོས་རྐྱང་ཅིག་གསོལ་ཞིང་བསྒོམས། ཟླ་བ་དགུར་ལག་པ་རྡུལ་དང་མ་བྲལ་བར་བསྒོམས་པས། སྒོམ་ཆེན་བརྒྱད་བརྒྱའི་ནང་ན་སྒོམ་སྲན་ཆེ་བར་གྲགས། ཏིང་ངེ་འཛིན་གྱི་ཡོན་ཏན་དཔག་ཏུ་མེད་པ་འཁྲུངས། ཆོས་རྗེས་ལུང་བསྟན་ནས་ཟངས་རི་ལ་སྒོམ་དུ་བྱོན་ཏེ། ཏིལ་ཕུག་ཏུ་ཟླ་བ་བཞི། ཕག་མོ་གྲུར་ཟླ་བ་གཅིག་དང་ཞག་ལྔ་བསྒོམས་པས་སེམས་ཀྱི་གནས་པ་ལ་རང་དབང་ཐོབ་པ་དང་རླུང་ཉམས་དཔག་ཏུ་མེད་པ་བྱུང༌། ལྷག་མཐོང་སྤྲིན་བར་གྱི་ཉི་མ་ལྟ་བུ་ཡང་བྱུང༌། སླར་བླ་མའི་སྤྱན་སྔར་བྱོན་ནས་དཀའ་ཐུབ་མཛད་ཅིང་ལོ་གསུམ་བཞུགས། ལོ་རེར་རས་ཆུང་པ་དང་མཇལ་ནས། ཆོས་དྲུག་དང་ཐུན་འཇོག་ལ་སོགས་ནཱ་རོ་མེ་ཏྲིའི་གདམས་པ་ཇི་སྙེད་པ་གསན། ཐབས་ལམ་དམར་ཁྲིད་དུ་མཛད་པས་བདེ་སྟོང་ལྷན་ཅིག་སྐྱེས་པའི་ཡེ་ཤེས་ངོ་འཕྲོད་པ་མེ་ལོང་ལ་བཞིན་མཐོང་བ་བཞིན་བྱུང༌། རྩི་མོ་ནམ་མཁའ་ལ་ཟབ་