[A:563]གདུག་པ་ཅན་འདུག་པའང་བཏུལ། དེ་ནས་ནཱ་རོ་ཆོས་དྲུག་གི་རྒྱབ་ཏུ་དགྱེས་པ་རྡོ་རྗེའི་རྒྱུད་གསན་པར་རི་བོར་རྔོག་གི་སར་བྱོན་ནས། རྒྱུད་གདམས་ངག་མང་དུ་གསན། དེ་ནས་བླ་མ་དོ་བའི་སར་བྱོན་ནས་བདེ་མཆོག་གི་དབང་དང་རྒྱུད་རྣམས་ལེགས་པར་གསན། དེ་ནས་རྟ་གཉིས་ཀྱིས་སྣ་དྲངས་པའི་འབུལ་བ་མང་པོ་ཁྱེར་ནས་ལྷ་སར་བྱོན་པས། སློབ་དཔོན་སྒོམ་པ་མ་ཕེབས་པ་ལ་རྨི་ལམ་བརྟགས་པས་མྱུར་དུ་འབྱོན་པར་ཤེས་ཤིང༌། མཇལ་མ་ཐག་འབུལ་བ་རྣམས་ཕུལ། སློབ་དཔོན་སྒོམ་པའི་ཞལ་ནས། ཁྱོད་ངའི་རྩར་སྡོད་ཅིག མི་འདི་རྣམས་ཀྱི་ནང་ན་ཁྱོད་བསོད་ནམས་ཆེ་བ་ཅིག་འོང་གསུང༌། སྤྱིར་ན་བླ་མ་འདིས་ཡི་དམ་གྱི་ལྷ་གཟིགས་པ་དང༌། མཚན་ཐོས་པ་ཙམ་གྱིས་རྟོགས་པ་སྐྱེས་པ་དང༌། སྨྱོ་བ་བཏུལ་བ་ལ་སོགས་པའི་ཕྲིན་ལས་དཔག་ཏུ་མེད་པ་བྱུང་སྟེ། འདིར་ཕྱོགས་ཙམ་ཞིག་བརྗོད་པ་ཡིན་ནོ། །སྒམ་པོ་བའི་དངོས་སློབ་ཀྱི་སྐབས་སོ། ། ། །
སྤྲུལ་པའི་སྐུའི་རིམ་པ་དང་པོའི་སྐབས།
རྗེ་སྒམ་པོ་བའི་བུ་ཆེན་དུས་གསུམ་མཁྱེན་པ་དེ་ནི། བསྐལ་པ་བཟང་པོའི་བྱང་ཆུབ་སེམས་དཔའ་བཅོམ་ལྡན་འདས་བྱམས་པའི་རྗེས་ལ། དེ་བཞིན་གཤེགས་པ་སེང་གེ་ཞེས་བྱ་བར་འགྱུར་བ་ཡིན་ལ། བསྐལ་བཟངས་ཀྱི་སངས་རྒྱས་ཐམས་ཅད་ཀྱང་མངོན་པར་རྫོགས་པར་སངས་རྒྱས་ནས། གཟོད་བྱང་ཆུབ་སེམས་དཔའི་ཚུལ་བསྟན་པར་དམ་པའི་ཆོས་པདྨ་དཀར་པོ་