[A:557]སྤྱན་དྲངས་བྱུང་བས་ལོགས་ཅིག་ཁེངས། རིན་པོ་ཆེ་འགྲོལ་བ་ལ་སོགས་པའི་སློབ་མ་ཡང་མང་དུ་བྱུང༌། འཇིག་རྟེན་གྱི་གཉའ་དང་འདུན་མ་ལ་སོགས་པའི་གཞན་དོན་ཡང་མང་དུ་མཛད། མཐར་དགུང་ལོ་བདུན་ཅུ་རྩ་ལྔ་བཞེས་པའི་ཚེ་སྐུ་གཤེགས། གདུང་སྦྱངས་པས་ཐུགས་ལྗགས་དང་ཕྱག་གཡོན་པ་མ་ཚིག་པར་བྱོན། དེ་རྣམས་ན་ཀྲའི་གདུང་ཁང་ན་བཞུགས་སོ། །དེའི་གདན་ས་འབྲི་ཁུང་གླིང་བར་གྲགས་པ་དབོན་ཤེས་རབ་འབྱུང་གནས་ཀྱིས་མཛད། དེ་ནས་དམ་ཆོས་གླིང་བ། སྤྱན་སྔ་ཆོས་ཚུལ་བ། རིན་པོ་ཆེ་ལྷ་ལུང་བ། རིན་པོ་ཆེ་བོན་གནས་པ། རིན་པོ་ཆེ་ཆོས་དབང་བ་ལ་སོགས་པ་རྣམས་བྱོན་ནོ། །སྒམ་པོ་བ་གདན་ས་དང་བཅས་པའི་སྐབས་སོ། །
སྒམ་པོ་བའི་དངོས་སློབ་ཀྱི་སྐབས།
རྗེ་སྒམ་པོ་བའི་བུ་ཆེན་རྣལ་འབྱོར་ཆོས་གཡུང་ནི། ཀླུངས་ཤོད་རོང་གི་ངལ་མདར་ཡོ་མི་ཀླུ་ཕྱུག་བྱ་བའི་སྲས་སུ། ལྕགས་ཕོ་འབྲུག་ལ་འཁྲུངས། བཅུ་དགུ་ལ་བྱ་ཡུལ་བ་ལ་རབ་ཏུ་བྱུང༌། ཉི་ཤུ་རྩ་གཉིས་པ་ལ་སྒམ་པོ་བ་དང་མཇལ། ཡོན་ཏན་ཁྱད་པར་ཅན་བརྙེས། སྒམ་པོ་སྐུ་མཆེད་བཞུགས་རིང་ལ་ཚོགས་པ་མ་བསྐྱངས། དེ་རྗེས་ལོ་བདུན་དུ་ཚོགས་པ་བསྐྱངས་ནས། དོན་བརྒྱད་པ་མེ་མོ་བྱ་ལ་གཤེགས། །
ཡང་དྭགས་པོའི་སློབ་མ་གྲུབ་རྟགས་མཆོག་ཏུ་གྱུར་པ་གྲོལ་སྒོམ་ཆོས་གཡུང་ནི། ཡུལ་འོལ་ཁ་བ། ཡབ་ལྷ་རྗེ་སྨོན་ལམ་འབར་དང༌། ཡུམ་