[A:530]གོང་དུ་གཤེགས་ནས་སྤུར་སྦྱངས་པས་རིང་བསྲེལ་དཔག་ཏུ་མེད་པ་བྱོན་ནོ། །ཁྱུང་ཚང་བའི་སློབ་མ་མ་ཅིག་ཨོང་ཇོ་ནི། འོ་ཡུག་ཏུ་འཁྲུངས། གདུང་རུས་རྒྱ་ཡིན། སྤྱིར་གདམས་ངག་ལ་གཞོན་དུས་ནས་ཐོས་བསམ་མང་པོ་མཛད། བྱེ་བྲག་ཏུ་ཁྱུང་ཚང་བ་དང་མཇལ་ནས། སྙན་བརྒྱུད་ཀྱི་གདམས་ངག་རྫོགས་པར་ཐོབ། གནས་ལུགས་རྟོགས་པའི་རྟོགས་པ་ཁྱད་པར་ཅན་བརྙེས། དངོས་པོ་ཐམས་ཅད་བླ་མ་ལ་འབུལ་བའི་སྦྱིན་པ་དང༌། སྒ་གོང་དུ་དབང་གི་ཤེས་རབ་མ་བྱས་པས་ཉམས་སྐྱེས་ཏེ་སྡོམ་པ་གསུམ་ལྡན་དུ་གྱུར་བའི་ཚུལ་ཁྲིམས་ཅན་དང༌། རིམ་པ་གཉིས་ཆུ་བོའི་རྒྱུན་བཞིན་དུ་གྱུར་བའི་བརྩོན་འགྲུས་དང༌། རང་སེམས་ཀྱི་མེ་ལོང་དག་པ་ལ་ལྷ་དང་བླ་མ་དབྱེར་མེད་དུ་ཤེས་པའི་བསམ་གཏན་དང༌། ཆོས་ཐམས་ཅད་སྐྱེ་བ་མེད་ཅིང་མཚན་མ་མེད་པར་བླ་མའི་དྲིན་གྱིས་རྟོགས་པའི་ཤེས་རབ་སྟེ། ཕ་རོལ་ཏུ་ཕྱིན་པ་དྲུག་གི་ཡོན་ཏན་དང་ལྡན་པའོ། །
ཡང་ཁྱུང་ཚང་བའི་སློབ་མ་དགེ་སྡིངས་པ་ནི། ཤངས་ཀྱི་ལྷ་ཕུར་ཟི་སྟོན་མ་རི་རྩེའི་སྲས་སུ་འཁྲུངས། ཇོ་སྲས་ཨ་སེང་ཞེས་བྱ། གཞོན་ནུ་ནས་རབ་ཏུ་བྱུང༌། གངས་པ་ཤེའུ་ལ་སོགས་པའི་མཁས་པ་མང་པོ་ལ་དབུ་མ་དང་སྤྱོད་ཕྱོགས་གསན། སློབ་དཔོན་རྒྱ་མ་བ་ལ་སོགས་པ་ལ་ཡོ་ག་ལ་སོགས་པའི་གསང་སྔགས་མང་དུ་གསན། དེ་ནས་ཁྱུང་ཚང་པའི་སྤྱན་སྔར་སྙན་བརྒྱུད་ཞུས། ཆོས་ཉིད་ཀྱི་རྟོགས་པ་དང་ལྡན་པ། རྟག་ཏུ་མཉམ་པར་