[A:502]ཞེས་ཟེར། །དེ་ལ་སློབ་མ་མང་དུ་ཡོད་ཀྱང་ཁམས་པ་རོ་མཉམ་རྡོ་རྗེ། མཁོན་གད་པ་ཀཱིརྟི། འཆེས་སྟོན་བསོད་ནམས་རྒྱལ་མཚན་གསུམ་གཙོ་བོ་ཡིན། །དེ་ལ་ཁམས་པ་རོ་མཉམ་རྡོ་རྗེ་ནི། རྒྱ་གར་དུ་གསང་བ་འདུས་པ་ཚོལ་བ་ལ་བྱོན། །དེ་ཡང་རྗེ་མཻ་ཏྲི་བ་ལ་ཉན་འདོད་པ་ལ། །དེ་ཡང་གཤེགས་ནས་མ་མཇལ། །གཞན་གསང་འདུས་ཉན་པའི་ས་མ་རྙེད་པར། །རྗེ་མར་པ་ལ་མཉན་སྙམ་ནས་བོད་དུ་བྱོན་པ་ལ། །ཨ་ཙར་གཉིས་དང་ལམ་དུ་མཉམ་དུ་བྱུང་བས། ཁྱེད་གཉིས་གང་དུ་འགྲོ་བྱས་པས། འཚུར་ལ་འདུས་པ་ཉན་དུ་འགྲོ་ཟེར་བ་དང༌། རྗེ་མར་པ་ཡང་གཤེགས་ནས་མི་སྣང་བས། འཚུར་ལ་འཁོན་གད་པ་ཀཱིརྟི་དང་མཉམ་དུ་གསན། ཁོང་གཉིས་ལ་རྒྱུད་མན་ངག་དང་བཅས་པ་གནང༌། ཁམས་པས་འཚུར་གྱི་གསུང་བཞིན་དུ་རྒྱུད་རྐྱང་གི་ཊཱི་ཀ་ཡང་མཛད། དེ་དང་མཐུན་པར་དབང་གི་ཆོ་ག་ཡང་མཛད་སྣང་སྟེ། གཞི་ནི་སློབ་དཔོན་ཀླུ་སྒྲུབ་ཀྱིས་མཛད་པའི་དཀྱིལ་འཁོར་གྱི་ཆོ་གར་སྣང་ངོ༌། །འདི་དང་རྗེས་སུ་འབྲེལ་བར་རྗེ་མར་པས་མཛད་པའི་རྒྱུད་ཀྱི་སྤྱི་དོན་ཞིག་ཀྱང་སྣང་ལ། གཉིས་མེད་རྣམ་རྒྱལ་ཆེན་པོ་འདི་དུས་ཕྱིས་བོད་པས་བརྩམས་པའི་རྫུན་མ་ཡིན་ཟེར་བ་མང་པོ་བྱུང་ཞིང༌། ལ་ལ་ན་རེ་རྒྱ་ཕོ་བ་ལུང་པས་བྱས་ཀྱང་ཟེར་ཏེ། ཁམས་པ་རོ་མཉམ་གྱི་ཊཱི་ཀ་ན་འདི་ཚད་མར་བྱས་སྣང་བས་རྒྱ་ཕོ་བ་ལུང་པའི་དོན་མི་སྣང་ངོ༌། །འཁོན་གད་པ་ཀཱིརྟི་དེ་ཡང༌། མང་ར་སེང་གེ་རྒྱལ་མཚན་ལ་ཡུན་རིང་དུ་བརྟེན་པའི་སློབ་མ་འཕགས་སྐོར་ལ་ཤིན་ཏུ་མཁས་པ་ཡིན་ཞིང༌། ཁོང་གི་བསམ་