[A:497]ཟག་འགའ་རེས། བདག་པོ་དྲུང་ཆེན་པ་ལ་ལོག་པར་ཞུས་པས། བཀའ་བཀྱོན་བྱུང་སྟེ་བྱ་བ་རྣམས་འབྲིང་ཙམ་དུ་བཞུགས་པ་ལ། རྗེ་ཙོང་ཁ་པ་ཆེན་པོ་གྲུམ་བུ་ལུང་དུ་ཆོས་གསུང་བའི་ཚེ་མཇལ་དུ་བྱོན་པས། རྗེས་བཀུར་སྟི་ཆེན་པོ་མཛད། མཁྱེན་པའི་ཡོན་ཏན་རྣམས་ལ་རྩད་གཅོད་གནང༌། དེར་ངོ་མཚར་ཆེ་བའི་གསུང་ཡང་ཡང་བཟླས་པ་མཛད་ཅིང༌། ཕྱིས་ཀྱང་བསྔགས་པ་མང་དུ་མཛད་པས་སྡེ་སྣོད་འཛིན་པ་ཆེན་པོ་རྣམས་ཀྱང་ཡིད་ལྷོངས་ཏེ། འབྲས་སྤུངས་ཆོས་རྗེ་བཀྲ་ཤིས་དཔལ་ལྡན་པ་དང༌། མཁན་ཆེན་པདྨ་བཟང་པོ་ལ་སོགས་པའི་མཁྱེན་རབ་ཅན་གྱི་སློབ་མ་ཡང་མང་དུ་འདུས། སྟག་ལུང་རིན་པོ་ཆེ་དཔལ་ངག་གི་དབང་པོས་ཀྱང་ཆོས་མང་དུ་གསན། ཆོས་སངས་རྒྱས་རྒྱལ་མཚན་གྱིས་ཀྱང་རྔོག་ལུགས་ཀྱི་དབང་ཞུས། དེ་རྗེས་མིའི་བདག་པོ་གྲགས་པ་འབྱུང་གནས་ཀྱིས་སྤྱན་དྲངས་ནས་རྔོག་ལུགས་ཀྱི་དབང་དང་རྒྱུད་བཤད་གདམས་པ་དང་བཅས་པ་ལེགས་པར་གསན་ཞིང༌། ཤིན་ཏུ་གུས་པའི་སྒོ་ནས་བཀུར་སྟི་ཆེན་པོ་མཛད། ལྡུམ་ཆུང་བ་དོན་གྲུབ་དཔལ་བ་དང༌། བྱམས་གླིང་ཆོས་ཀྱི་རྗེ་བསོད་ནམས་རྣམ་པར་རྒྱལ་བ་དང༌། སྨྲ་བའི་ཁྱུ་མཆོག་ཆེན་པོ་དཔལ་ཆོས་ཀྱི་གྲགས་པ་དང༌། དྲུང་བསོད་ནམས་རྒྱལ་མཚན་པ་རྣམས་ཀྱང་མཁྱེན་རབ་ལ་ཤིན་ཏུ་གུས་ཤིང་གསན་པ་མང་དུ་མཛད། ཕྱག་དཔེ་བརྟག་གཉིས་ཀྱི་གཞུང་རྡོ་རྗེ་མར་གྲགས་པ་ཞིག་ལ་ཆོས་ཚར་རེ་ལ་མཚན་མ་རེ་བཏབ་པའི་གྲངས་བརྒྱ་དང་བརྒྱད་ཅུ་རྩ་གཉིས་སྣང༌། བར་སྐབས་སུ་གདན་ས་བ་རྣམས་ལ་གདན་བཞིའི་བཤད་རྒྱུན་ཆད་