[A:493]པ་ཤིན་ཏུ་གཙང༌། མདོ་སྡེས་རྔོག་ལ་ཉན་པས་བཤད་པ་ཉོག་པོ་དེ་བྱུང་བ་ཡིན་ཟེར། རམ་དེས་ཀྱང་རྒྱུད་ཀྱི་བཤད་པ་མང་དུ་མཛད་པས། དབོན་པོ་རམ་རྡོ་རྗེ་བཙན་ལ་སོགས་པ་དང༌། མཁས་པ་རྒྱ་ནམ་ཡང་སློབ་མར་གྱུར། རྒྱ་ནམ་ལ་ཏྲེ་བོ་མགོན་པོས་དང་པོར་རྩོད་པ་བྱེད་དུ་འོངས། རྩོད་པ་མ་ཐུབ་པས་སློབ་མར་གྱུར་ཏེ། ཀྱེ་རྡོར་གྱི་དབང་རྒྱ་ནམ་ལ་ཞུས་པའི་ཚེ། སོ་ཤིང་ནམ་མཁའ་ལ་ཆགས་པས། རྒྱུད་གསང་འདུས་ལ་མོས་ཀྱང་ལས་འབྲེལ་ཀྱེ་རྡོར་དང་འདུག་སྙམ་པ་བྱུང༌། རྒྱ་ནམ་གྱིས་ཀྱེ་རྡོར་གྱི་ཊཱི་ཀ་ཡང་ལེགས་པར་མཛད། ཏྲེ་བོས་དེ་གཟུང་ནས་བཤད་པ་ཡང་མང་དུ་མཛད། ཏྲེ་བོའི་སློབ་མ་ཆོས་ལ་དགོས་ཀྱང་རམ་ལུགས་དང་མཐུན་པའི་ཊཱི་ཀ་བརྩམས། སྙེ་མདོ་ཐམས་ཅད་མཁྱེན་པས་ཀྱང་ཏྲེ་བོའི་སློབ་མ་གཉན་རྡོ་རྗེ་སེང་གེ་ལ་གཏུགས་ནས་རམ་ལུགས་རྣམས་ལེགས་པར་མཉན་ཏེ། རང་གི་སྲས་བརྒྱུད་ཀུན་དགའ་དོན་གྲུབ་ལ་སོགས་པ་རྣམས་ལ་ཡང་བཤད་པ་དེའི་རྒྱུན་ཡོད་དོ། །རྔོག་མདོ་སྡེ་ལ་སློབ་མ་རྩགས་དྷརྨ་རཱ་ཛ། འགར་བཀྲ་ཤིས་རིན་ཆེན། འཚེའུ་དར་རེ། མལ་ཡེར་པ་བ། ཏྲེ་བོ་མགོན་པོ། ངོར་རྗེ་ཀུན་དགའ་འོད། གཤེན་པ་རྡོ་རྗེ་སེང་གེ མཉམ་མེད་ཤཱཀྱ་ཡེ་ཤེས། ཅོག་རོ་ཆོས་རྒྱལ། ལྷ་ཕྱུག་མཁར་བ། སྡོ་ཚ་ཆོས་སྐུ། དྲན་སྟོན་མཐའ་བྲལ། ལྷོ་ནག རྒྱལ་ཚ་རིན་ཆེན་མགོན་ལ་སོགས་པ་མཐའ་ཡས་པ་བྱོན་ནོ། །རྔོག་མདོ་སྡེས་གཙང་ཆུ་མིག་ཏུ་བཞུགས་དུས། མཚན་མོ་ཞིག་ཕྱག་རྒྱ་མ་ཞིག་གི་སར་བྱོན་བར་བརྩམས་པས། ཇོ་མོ་སྒྲེ་མོ་ཞེས་