[A:488]མར་པ་མགོ་ཡགས། རྔོག་གཞུང་བ། འཚུར་དབང་ངེ༌། མེས་ཚོན་པོ། ལྷ་རྗེ་སེ་རིངས། རྒྱ་སྟོན་ཞིག་པོ། མར་པ་བྱ་ཟེ་བ། མྱང་སྒོམ་སྦྲང་ལྟག རྗེ་བཙུན་མི་ལ་རྣམས་སོ། །
གཞན་ཡང་གཉལ་གྱི་ཤུང་ཀེ་ལྦ་བ་ཅན་ལ་སྒྲོན་མ་གསལ་བའི་བཤད་པ་ཡང་དག་པར་གནང་སྟེ། དེས་ཀྱང་རང་གི་སློབ་མ་ལ་བཤད་པ་ལན་འགའ་ངར་བགྱིས་ནའང་རྒྱུན་རིང་བ་ནི་མ་བྱུང་ངོ༌། །དེ་རྣམས་ལས་རྔོག་ཆོས་རྡོར། འཚུར་དབང་ངེ༌། མེས་ཚོན་པོ། མི་ལ་རས་པ་རྣམས་ལ་ཀ་ཆེན་བཞི་ཡང་ཟེར། རྔོག་གིས་དང་པོར་རྟ་བཟང་པོ་ཞིག་ཕྱག་རྟེན་དུ་བསྣམས་ལྷོ་བྲག་ཏུ་མཇལ་བ་ལ། ཁྱོད་ཀྱི་འདི་ཆོས་ཞུ་བའི་ཞུ་རྟེན་ཡིན་ན་ནི་ཆུང༌། ཞལ་མཇལ་བའི་རྟེན་ཡིན་ན་ནི་ཆེ་ཞེས་ཀྱང་གསུངས། དེར་དབང་དང་གདམས་པ་འགའ་རེ་གནང་ཞིང༌། ཕྱིས་རི་བོར་སྤྱན་དྲངས་ནས་འབྲི་གནག་བདུན་ཅུ་སྦྲ་དང༌། ཁྱི་དང༌། ཤེ་མ། ཟོ་བ་གཅིག་རྣམས་ཀྱང་ཕུལ་ཏེ། དེ་ལ་ཀྱེའི་རྡོ་རྗེ། བཤད་པའི་རྒྱུད་གུར། དཔལ་གདན་བཞི་པ། མ་ཧཱ་མཱ་ཡཱ་རྣམས་གནང༌། ཟབ་ཁྲིད་ཀྱིས་ཀྱང་བསྐྱངས། རྔོག་གི་ཞལ་ནས། ང་རང་གི་ཡོ་བྱད་ཀྱིས་དེ་ལས་མ་ལྡངས། བླ་མའི་ཆོས་ལ་ནི་ཟད་པ་མེད་པ་ཡིན་གསུང།
ཡང་རྗེ་མར་པས་སྐུ་འདས་ཁར་ཡང་གཞུང་རི་བོར་ཕེབས་པ་ཞིག་ཡིན་པ་འདྲ་སྟེ། རྔོག་གི་སྲས་མོ་མདོ་སྡེས་རྗེ་མར་པ་ལས་ལུང་ཙམ་ཐོབ། ལོ་བརྒྱད་ལོན་པའི་ཚེ་རྗེ་མར་པ་གཤེགས། བཅུ་གསུམ་ལོན་པའི་ཚེ་ཡབ་