[A:463]ཏུ་
རྟ་གསོ་ཞིང་བསྡད་པའི་ཚེ། བོད་སྐད་ཤེས་ཤིང་པྲང་ཏི་ལ་མངོན་པ་ཀུན་ལས་བཏུས་མཉན་པས་ཤེས། སློབ་དཔོན་དང་རྩོད་པ་བྱས་པས་ཀྱང་བྷ་དནྟ་རྒྱལ། བྷ་དནྟས་ང་པནྚི་བྱས་ཏེ་
འོང་བས་དེའི་ཚེ་སློབ་དཔོན་གྱིས་སྣེ་ལེན་དགོས་ཟེར་བ་བྱས། ཁོང་དཔོན་གཡོག་གིས་
གསེར་སྲང་ལྔ་བརྒྱ་རྙེད། རྒྱུན་བཞག་དང་ཚོགས་རྒྱུན་རིང་དུ་མ་ཆད་པར་ཡོད་པ་ཡིན་ནོ།
།ལོ་ཙཱ་བ་ཀློག་སྐྱ་ཤེས་རབ་རྩེགས་ཀྱིས་ཕམ་མཐིང་བ་ལ་བདེ་མཆོག་སྐོར་གསན་ནས་བོད་དུ་བྱོན་པའི་ཚེ། མལ་གྱོ་ལོ་ཙཱ་བ་བློ་གྲོས་གྲགས་ཀྱིས་བདེ་མཆོག་གི་དབང་དང་སྒྲུབ་སྐོར་རྣམས་ཞུས། ཕྱིས་མལ་གྱོ་ཉིད་བལ་པོར་བྱོན་ནས་ཕམ་མཐིང་བ་སྐུ་མཆེད་དང༌། ནཱ་རོ་པའི་སློབ་མ་
བྱང་ཆུབ་བཟང་པོ་དང༌། བལ་པོ་ཀ་ན་ཀ་ཤྲཱིའི་སློབ་མ་བལ་པོ་ཐུགས་རྗེ་ཆེན་པོ་རྣམས་ལ་
བདེ་མཆོག་སྐོར་ལེགས་པར་གསན། དེ་ལ་བླ་མ་ས་ཆེན་གྱིས་གསན། དེས་ཕྱིས་རྒྱུད་ལ་བཤད་པ་མཛད་པའི་ཚེ་སྐུ་ལུང་པ་བསོད་ནམས་རྡོ་རྗེས་ཟིན་བྲིས་སུ་བཏབ། དེ་ལ་ས་ཆེན་གྱིས་མཛད་པའི་ཊཱི་ཀར་ཡང་གྲགས། ས་ཆེན་གྱིས་རང་གི་སྲས་རྩེ་མོ་སྐུ་མཆེད་ལ་
གསུངས། རྗེ་བཙུན་གྱིས་ས་སྐྱ་པཎ་ཆེན་ལ་བཤད། དམར་ཆོས་ཀྱི་རྒྱལ་པོས་
རྗེ་བཙུན་ལ་བདེ་མཆོག་གསན་ཞིང༌། པཎ་ཆེན་ལ་རྒྱུད་གསུམ་མན་ངག་དང་བཅས་པ་
ཡང་ལེགས་པར་བསླབས།
དམར་ཆོས་ཀྱི་རྒྱལ་པོ་དེ་ནི། སྤུ་ཧྲངས་ལོ་ཆུང་གི་སློབ་མ་དམར་ཆོས་ཀྱི་རྒྱལ་མཚན་གྱི་
དབོན་བརྒྱུད་ཡིན་ཏེ། དཔོན་པོ་དམར་ཤེས་རབ་རྡོ་རྗེ། ཐུབ་པ་ཤེས་རབ། བརྩོན་འགྲུས་རྡོ་རྗེ་རྣམས་བྱུང་བ་ལས།