[A:430]རིན་ཆེན་བཟང་པོ་ཞེས་གྲགས་པ་དེས། སྤྱིར་
ཕ་རོལ་ཏུ་ཕྱིན་པ་དང་སྔགས་ཀྱི་གཞུང་ཐམས་ཅད་མཁྱེན་ཅིང་བཤད་པ་ཡང་མཛད་མོད། བྱེ་བྲག་ཏུ་
རྣལ་འབྱོར་གྱི་རྒྱུད་ཀྱི་བཤད་པ་ཇི་ལྟར་མཛད་པ་ནི།
ལོ་ཙཱ་བ་ཆེན་པོ་དེས་ཁ་ཆེར་ལན་གསུམ་བྱོན། དེར་བླ་མ་མང་པོ་བསྟེན། བོད་དུ་ཡང་པནྚི་ཏ་མང་པོ་སྤྱན་དྲངས། བཤད་པའི་སྲོལ་ལེགས་པར་བཙུགས་ཏེ། དེ་ཉིད་བསྡུས་པའི་རྒྱུད་ལ་འགྲེལ་པ་སློབ་དཔོན་ཀུན་སྙིང་གིས་མཛད་པའི་དེ་ཉིད་སྣང་བ་དང༌། དཔལ་
མཆོག་གི་རྒྱུད་ཀྱི་འགྲེལ་པ་སློབ་དཔོན་ཀུན་དགའ་སྙིང་པོས་མཛད་པ་ཡང་ཧོལ་ཁོངས་འགའ་རེ་ལུས་པ་ཞིག་དང༌། ཀུན་དགའ་སྙིང་པོས་མཛད་པའི་རྡོ་རྗེ་འབྱུང་བའི་ཆོ་ག་ལག་ལེན་དང་བཅས་པ་རྣམས་
དང༌། སྒྱུ་འཕྲུལ་དྲ་བའི་རྒྱུད་སློབ་དཔོན་ཀུན་དགའ་སྙིང་པོའི་བཤད་པ་དང་བཅས་པ་དང༌། ཐམས་ཅད་གསང་བའི་རྒྱུད་སློབ་དཔོན་ཤཱནྟི་བའི་འགྲེལ་པ་དང་བཅས་པ་དང༌། དེ་དག་གི་ཕན་མང་པོ་
ཡང་བསྒྱུར་ཞིང་ཕྱག་ལེན་དུ་མཛད་དེ་ལེགས་པར་བསྐྱངས་པ་ལས།
མངའ་རིས་དང་དབུས་གཙང་བའི་སློབ་མ་ཡང་མང་དུ་བྱུང་བ་ལས། ལོ་ཆུང་ལེགས་པའི་
ཤེས་རབ། མང་ནང་གི་གུར་ཤིང་བརྩོན་འགྲུས་རྒྱལ་མཚན། གྲྭ་པ་གཞོན་ནུ་ཤེས་རབ། སྐྱི་ནོར་ཛཱ་ན་དང་བཞི་ལ་ཐུགས་ཀྱི་སྲས་བཞིར་གྲགས།
གཞན་ཡང་སྤུ་ཧྲངས་པ་ཨན་སྟོན་གྲགས་རིན། རྒྱ་ཡེ་ཚུལ། གུང་བ་དགེ་བཤེས། མང་ཡུལ་བ་དཀོན་མཆོག་བརྩེགས་རྣམས་ཏེ། བཞི་པོ་ནི་ལོ་ཆེན་ལོ་ཆུང་གཉིས་གའི་སློབ་མ་ཡིན།
གཞན་ཡང་མྱང་སྟོད་རྒྱང་རོ་སྤྲེའུ་དམར་གྱི་རྐྱང་པ་ཆོས་