[A:416]ནས། སློབ་དཔོན་ཟླ་བ་གྲགས་པའི་གཞུང་གི་བཤད་པ་ཇི་ལྟར་བྱུང་བ་ལ། སྤ་ཚབ་ཉི་མ་གྲགས་པ་ནི། འཕན་ཡུལ་ན་སྤ་ཚབ་སྟོད་སྨད་གཉིས་ཡོད་པའི་སྟོད་པ། གཞོན་པའི་དུས་སུ་ཁ་ཆེར་བྱོན་ཏེ། སཛྫཱ་ནའི་སྲས་གཉིས་ལ་སོགས་པའི་པནྚི་ཏ་མང་པོ་ལ་ཆོས་གསན་ཞིང༌། ལོ་ཉི་ཤུ་རྩ་གསུམ་དུ་སྦྱངས་པ་མཛད་ནས་བོད་དུ་ཕེབས་པའི་ཚེ། སྤུ་ཧྲངས་པའི་དགེ་འདུན་སྤྱིས་གཡུ་བོ་ཆེ་ཕག་སྐུར་ཟེར་བ་ཞིག་ཕུལ་ནས། མཛོད་ཀྱི་འགྲེལ་བཤད་གང་བ་སྤེལ་གྱིས་མཛད་པ་དེ་བསྒྱུར་བར་ཞུས་པས་ལེགས་པར་བསྒྱུར། འཕན་ཡུལ་དུ་ཕེབས་དུས་གདུལ་བྱ་ཧ་ཅང་མི་ཆེ་བ་ལ། དགེ་བའི་བཤེས་གཉེན་ཤར་པ་བས་རང་གི་གྲྭ་པ་མང་པོ་ཁོང་ལ་དབུ་མ་སློབ་ཏུ་བཏང་བས། དེ་ནས་དབུ་མའི་འཆད་ཉན་ལེགས་པར་ཚུགས་ཏེ་གྲྭ་པ་མང་དུ་བསྐྱངས། རྩ་འཇུག་བཞི་གསུམ། རིགས་པ་དྲུག་ཅུ་པ་རྣམས་ཀྱི་སློབ་དཔོན་ཟླ་བས་མཛད་པའི་འགྲེལ་པ་རྣམས་ལེགས་པར་བསྒྱུར་ཞིང༌། ཕྱིས་ར་མོ་ཆེར་པནྚི་ཏ་ཀ་ན་ཀ་ཝརྨ་དང་ལྷན་ཅིག་ཏུ་ཡུལ་དབུས་ཀྱི་དཔེ་དང་མཐུན་པར་ཡང་བཅོས། སྟོང་ཉིད་བདུན་ཅུ་པ་ལ་སློབ་དཔོན་ཟླ་བས་མཛད་པའི་འགྲེལ་པ་ཆེན་པོ་དེ། ཨ་བྷ་ཡ་དང་སྣུར་དྷརྨ་གྲགས་ཀྱིས་བསྒྱུར་པ་ལས། སྤ་ཚབ་ཀྱིས་པནྚིཏ་མུ་དི་ཏ་དང་ལྷན་ཅིག་ཏུ་འགྲེལ་པ་དེའི་སྟོད་ནས་བམ་པོ་གཉིས་ལྷག་ཙམ་གྱི་འགྱུར་བཅོས། གསང་བ་འདུས་པའི་རྒྱ་ཆེར་འགྲེལ་པ་སྒྲོན་མ་གསལ་བ་ལ། སྒྱུར་བྱེད་བཟང་བར་གྲགས་པ་རིན་ཆེན་བཟང་པོ་ལྟས། བསྒྱུར་ཞུས་གཏན་ལ་ཕབ་པར་རློམ་ཡང་ཇི་ལྟ་བཞིན་མིན་པར་མཐོང་ནས་ཉི་མ་གྲགས་ཀྱིས་