[A:412]རྣམས་ཉིད་ལ་ཕྱི་མོ་བྱས་ནས་ཁམས་ཉིད་དུ་བཞེངས་པ་དང༌། ཆོས་རྗེ་མཐོང་བ་དོན་ལྡན་པས་བཞེངས་པ་དང༌། དབུས་སུ་དུ་དབེན་ཤ་བས་བཞེངས་པ་དང༌། འཚུར་ཕུར་ན་ཡང་ཆོས་རྗེ་རང་བྱུང་བས་རིན་པོ་ཆེ་ལས་བཞེངས་པ་དང༌། བྱམས་པ་གླིང་དུ་ཡར་རྒྱབ་དཔོན་ཆེན་དགེ་བསྙེན་པས་བཞེངས་པ་དང༌། གཟི་ཀུན་སྤངས་པས་པུ་སྟི་བརྒྱ་བརྒྱད་ཅུ་ཙམ་ཞིག་བཞེངས་པ་དང༌། སྟག་རྩེ་བས་ཀྱང་གཙུག་ལག་ཁང་བཟང་པོ་དང༌། བཀའ་འགྱུར་བསྟན་འགྱུར་སྔར་གྱི་སྟེང་དུ། དུས་ཕྱིས་ཕྱི་མོ་རྙེད་པ་མང་པོ་དང་བཅས་ཏེ་བཞེངས་པའི་བར་བགྲང་བ་ལས་འདས་པ་ཞིག་བྱུང་བ་རྣམས་ཀྱང༌། བཅོམ་ལྡན་རིགས་པའི་རལ་གྲིའི་སློབ་མ་བཙུན་པ་འཇམ་པའི་དབྱངས་ཀྱི་མཐུ་ལས་བྱུང་བ་ཡིན་ཏེ། འདི་རྣམས་ཀྱང་མཐར་གཏུགས་ན་རྔོག་ལོ་ཙཱ་བའི་བཀའ་དྲིན་དང༌། དེ་ཡང་ཁ་ཆེའི་མཁས་པ་རྣམས་ཀྱི་བཀའ་དྲིན་དང༌། མཐར་སངས་རྒྱས་རྣམས་ཀྱི་བཀའ་དྲིན་དུ་གྱུར་པའོ། །དིང་སང་མཁས་པ་ཤེས་རབ་སེང་གེ་དང་དེའི་སློབ་མ་མཁས་པ་ཆེན་པོ་དགེ་འདུན་གྲུབ་ཀྱིས་བཀྲ་ཤིས་ལྷུན་པོའི་གཙུ་ལག་ཁང་དང་ལྷ་ཆེན་པོ་བཞེངས། དགེ་འདུན་མང་དུ་བསྡུས་ནས་བཤད་པ་དང་ཉན་པ་འཕེལ་བར་བྱུང་བའང༌། ཐ་སྙད་དུ་རི་བོ་དགེ་ལྡན་གྱི་ཡན་ལག་ཏུ་གྲགས་པ་ཡང༌། དོན་དུ་ན་དཔོན་སློབ་གཉིས་པོ་དེ་སྣར་ཐང་པའི་དགེ་བཤེས་ཡིན་ནོ། །ཡང་རྩེས་ཐང་གི་ཆེན་པོ་བྱང་ཆུབ་རིན་ཆེན་གྱི་སྲས། ངོ་ལེན་རང་གི་ཉེ་གནས་གཡག་ཡུ་ཞེས་པ་ལ་བཅོལ་བས། གཡག་ཕྲུག་སངས་རྒྱས་དཔལ་ཞེས་གྲགས་པ་དེའི་རྩ་བའི་