[A:399]
དུམ་བུ་དྲུག་པ། རྔོག་ལོ་པ་ཚབ་བརྒྱུད་པ་དང་བཅས་པ་དང༌། དབུ་ཚད་བྱམས་ཆོས་སོགས་ཇི་ལྟར་བྱུང་བའི་སྐབས།
རྔོག་ལོ་བརྒྱུད་པ་དང་བཅས་པའི་སྐབས།
ད་ནི་ལོ་ཙཱ་བའི་དངོས་ཀྱི་སློབ་མ་རྣམས་ཀྱི་ཡང་སློབ་མར་གྱུར་པ། སྡེ་སྣོད་འཛིན་པ་ཆེན་པོ་གཞུང་ཆེན་པོའི་བཤད་པ་མཛད་པ་རྣམས་བཀའ་གདམས་ཀྱི་ལུགས་སྐྱོང་བའི་ངེས་པ་ནི་མེད་མོད། །འོན་ཀྱང་དཔལ་གསང་ཕུའི་གདན་རབས་དང༌། དེ་དག་གིས་བསྟན་པ་ལ་བྱ་བ་ཇི་ལྟར་བྱས་པའི་ཚུལ་བརྗོད་པར་བྱ་སྟེ། ལོ་ཙཱ་བ་ཆེན་པོ་རིན་ཆེན་བཟང་པོ་ས་ཕོ་རྟ་ལ་འཁྲུངས་ནས་དགུ་བཅུ་རྩ་བརྒྱད་པ་ཤིང་མོ་ལུག་ལ་གཤེགས། ལོ་ཆེན་གྱིས་ལྔ་བཅུ་རྩ་བཞི་བཞེས་པ་ལྕགས་མོ་ཕག་ལ་ནག་ཚོ་ལོ་ཙཱ་བ་འཁྲུངས། ནག་ཚོའི་བཞི་བཅུ་རྩ་དགུ་པ་ས་མོ་ཕག་ལ་རྔོག་ལོ་ཙཱ་བ་བློ་ལྡན་ཤེས་རབ་འཁྲུངས། དེས་ལོ་བཅོ་བརྒྱད་སོང་བ་མངའ་བདག་རྩེ་ལྡེའི་མེ་ཕོ་འབྲུག་གི་ཆོས་འཁོར་ལ། དྭགས་པོ་དབང་རྒྱལ། རྭ་ལོ། གཉན་ལོ། ཁྱུང་པོ་ཆོས་བརྩོན། མར་ཐུང་དད་པ་ཤེས་རབ། མང་ཞོར་བྱང་ཆུབ་ཤེས་རབ། བཙན་ཁ་བོ་ཆེ་རྣམས་ཀྱིས་ལྷན་ཅིག་ཏུ་སླེབ། ཁ་