[A:༤༧༦]དུ་བྱས་ན་ལོ་ངོ་བདུན་ཙམ་དམ་བཅར་བཞུགས་ལོ་དྲུག་གི་རིང་མཛད་པར་ཀུན་སྤངས་ཆེན་པོའང་དེ་བར་ཟབ་ཆོས་རྣམས་འཕྲོད་པ་གནང་ནས་མཁའ་སྤྱོད་དུ་གཤེགས་པར་བཞེད་པའི་དགོངས་པས་ཆོས་རྣམས་རྟག་འགྲུས་སུ་མཛད་པ་དང༌། རྗེ་བླ་མས་ཀྱང་ཉིན་མཚན་དལ་མེད་ལྟ་བུར་གསན་བསམ་ལ་བརྩོན་པའི་ཤུགས་ཀྱིས་བཞེད་པ་རྣམས་འགྲུབ་པར་བརྟེན་དགུང་ལོ་ཉེར་གསུམ་དུ་ཕེབས་པ་ཤིང་ཕོ་སྤྲེལ་ལོ་སྐྱེ་འཆི་ལ་རང་དབང་འདུས་པའི་དབང་གིས་རྗེ་བཙུན་རྡོ་རིང་ཆེན་པོ་དེ་ཉིད་ཞིང་གཞན་དུ་གཤེགས་པའི་གསུང་འགའ་ཤས་ཕེབས་པའི་ཚེ། བཀའ་ལས་བདག་གིས་སྦྱིར་བསྟན་པ་དང་སེམས་ཅན་གྱི་དོན་དང་ལྷག་པར་བདག་ཅག་མགོན་སྐྱབས་གཞན་མེད་པའི་འགྲོ་བ་རྣམས་ལ་ཐུགས་བརྩེ་བ་ཆེན་པོས་དགོངས་ནས་ཞབས་པད་ཡུན་རིང་དུ་བརྟན་པའི་ཐུགས་འདུན་ཅིས་ཀྱང་གནང་དགོས་ཞུས་པས། ད་ལོ་མ་ཤི་ན་ལོ་བརྒྱ་ཙམ་མི་ཐུབ་པའི་ངེས་པ་མི་གདའ་སྟེ། ད་རང་དེ་ཙམ་ཡིན་པ་འདྲ་ཆོས་རྗེ་རྡོ་རྗེ་འཆང་ཆེན་པོ་ལྟ་བུ་མཁས་གྲུབ་བསྟན་པའི་རྩ་ལག་དེ་ལའང་དགུང་ལོ་བདུན་ཅུ་དོན་ལྔ་ཐུབ་པ་ལ་ཀུན་གྱིས་སྐུ་ཚེ་མཐར་ཕྱིན་ཟེར་གྱིན་འདུག །ད་ལོ་འདི་ཙམ་ལོན་བླ་མ་བདུན་ཅུ་རྩ་གཉིས་ཀྱི་ཐུགས་ཟིན། སྡོམ་པ་དང་དམ་ཚིག་ལ་གནོང་འགྱོད་ཡེ་མེད། ལམ་འབྲས་ཐོག་མར་ཐོབ་ནས་ད་བར་ལམ་དུས་ཐུན་བཞི་མ་འདི་ཆག་མ་མྱོང༌། བསྟན་པ་དང་སེམས་ཅན་གྱི་དོན་ཡང་བྱེད་ཚད་བྱུང༌། ད་ངའི་ཚབ་ཁྱེད་ཚོས་བྱེད་ལས་ཆེ། རྗེ་བཙུན་རིན་པོ་ཆེས་དགའ་སྟོན་ལ་གདམས་པར། བླ་མའི་རྣལ་འབྱོར་འབྲལ་མེད་དུ་བསྒོམས་ན་བླ་མ་འབྲལ་མེད་དུ་