[A:༤༣༥]བར་བདག་མེད་བསྟོད་པར། སྦས་པའི་རྩ་ལྔ་བདུད་བྲལ་ཆ་དང་བཅས། །སྙིང་གི་དབུས་ཞུགས་གཙུག་ཏོར་མཆོག་ཏུ་ཐིམ། །འཕགས་པའི་ལམ་ལྔ་དྲུག་པ་ཆ་ཡི་དངོས། །རྡོ་རྗེ་འཛིན་པ་བཅུ་གསུམ་སར་ཕྱག་འཚལ། །ཞེས་བྱུང་ཞིང་མཚོ་མ་དྲོས་པའི་འགྲམ་དུ་ཤིང་ཛམྦུ་ཏྲི་ཤའི་འབྲས་བུ་རྫ་མ་ཙམ་པ་ཆུར་ལྷུངས་པའི་སྒྲ་ལས་ཛྃ་ཞེས་བྱུང་བས་གླིང་དང་ཤིང་གཉིས་ཀ་ལ་མིང་དེར་ཆགས་པའི་གླིང་འདི་ལ་ཤར་དུ་རྒྱ་ནག་དང་ཁྲི་བརྟན། ལྷོར་རྒྱ་གར་དང་ཁ་ཆེ། ནུབ་ཏུ་སྟག་སྡེ་དང་གཟིག་ཡན། བྱང་དུ་ཁྲོམ་དང་གེ་སར། དབུས་སུ་བོད་ཡུལ་གངས་ཀྱི་ར་བ་དང་དགུའོ། །ཞེས་པའི་བོད་ཁ་བ་ཅན་གྱི་ལྗོངས་འདི། བདེ་མཆོག་རྩ་རྒྱུད་ལས། བོད་ཀྱི་ཡུལ་དང་དེ་བཞིན་དུ། །མཱ་ལ་ཝ་དང་པཱུ་ལི་སོགས། །ཉི་ཤུ་རྩ་བཞིའི་ཡུལ་ཡིན་ནོ། །ཞེས་བདེ་མཆོག་ཏུ་བོད་འདི་སྲུང་འཁོར་གྱི་གནས་བརྒྱད་ཀྱི་ཟླ་ཚད་དང༌། ཀྱེ་རྡོར་དུ་གནས་དང་ས་སྦྱོར་བའི་ས་བཅུ་གཉིས་པར་བཤད་ཅིང༌། བལ་པོའི་རྒྱལ་པོ་དེ་ཝ་ལྷས་ཁྲི་བཙུན་ལ་གདམས་པར། ང་ཡི་སྙིང་དང་འདྲ་བའི་བུ་མོ་ཁྱོད། །བོད་ཅེས་བྱ་བ་ཁྱད་པར་འཕགས་པའི་ཡུལ། །རི་མཐོ་ས་གཙང་གངས་རི་གཉན་གྱི་མགུལ། །བསིལ་ལ་མཛེས་པ་ལྷ་གནས་གཞལ་ཡས་ཁང༌། །ངོ་མཚར་རྨད་བྱུང་ཕན་བདེ་འབྱུང་བའི་གཞི། །ཆུ་བོ་བཞི་འབབ་རྩི་ཤིང་ནགས་ཀྱིས་མཛེས། །འབྲུ་སྣ་ལྔ་འཁྲུངས་རིན་ཅེན་སྣ་ཚོགས་འབྱུང༌། །ཞེས་ཕུན་སུམ་ཚོགས་པའི་ཡོན་ཏན་ཁྱད་པར་དུ་འཕགས་པར་བསྟན་ཞིང༌། ཞིང་ས་དང་ཁང་ས་གཉིས་ཏེ་སའི་དགེ །ཁང་རྡོ་དང་ཆུས་བསྐོར་གྱི་རྡོ་སྟེ་རྡོའི་དགེ །ཞིང་ཆུ་དང་འཐུང་ཆུ་སྟེ་ཆུའི་དགེ །ཁང་ཤིང་དང་འབུད་ཤིང་སྟེ་ཤིང་གི་དགེ །གམ་