[A:༦༠༠]ཞིང་ཞི་བ་གལ་ཆེ། མེ་ཕོ་འབྲུག་ལོ་ཧོར་ཟླ་བཅུ་གཉིས་པའི་་ཚེས་བཅུ་ལ་དཔལ་ཞ་ལུ་གསེར་བཀང་གི་བླ་བྲང་ཆོས་དབྱིངས་བདེ་བ་ཆེན་པོའི་ཕོ་བྲང་ནས་བྲིས། ཞེས་ཟླ་བ་བཅུ་གཉིས་པའི་ཉེར་གསུམ་གྱི་ཉིན་ཐམས་ཅད་མཁྱེན་པ་བུ་སྟོན་རིན་པོ་ཆེའི་བཞུགས་ཁྲིའི་སྟེང་དུ་ཕེབས་པའི་མཐའ་སྐོར་གྱི་ཁྱོན་ཀུན་སྐྱ་སེར་གྱི་ཁྲོམ་ཁྲི་ཕྲག་ཏུ་བརྒལ་བས་བསྐོར། ཞ་ལུ་ཆོས་སྡེ་བ་རྣམས་ཀྱིས་རྡོ་རྗེ་འཇིགས་བྱེད་ཀྱི་སྒོ་ནས་དབྱུ་གུ་དྲུག་ཅུ་རྩ་བཞིའི་ཆོ་ག །ལས་ཀྱི་གཤིན་རྗེར་མཆོད་བཤགས་བསྐང་མདོས་རྒྱས་པར་བསྟར། ལྷོ་ཕྱོགས་ན་ས་འོག་རིམ་པ་བདུན་གྱི་རྣམ་པའི་ཁང་པ་ནས་འཆི་བདག་ལས་ཀྱི་གཤིན་རྗེ་ཡབ་ཡུམ་ལ་འཁོར་ལྷ་སྲིན་སྡེ་བརྒྱད་ཀྱི་འབག་ཆས་གོས་ཀྱི་ཁ་དོག་རྣམ་པ་སྣ་ཚོགས་པ་འགྲོས་ཀྱི་རྐང་གྲངས་ཀྱི་ངེས་བཟུང་མེད་པའི་ཡིད་ལ་གང་ཤར་གྱི་འཆམས་སྟབས་དང༌། ངག་ནས་སྐུ་སྒྲ་བསོ་སྒྲ་སོགས་སྒྲ་སྣ་ཚོགས་པས་ཕལ་ཆེར་རྣམ་རྟོག་དང་ཡ་ང་བའི་གནས་སུ་འགོད་པའི་གཙོ་འཁོར་དེ་རྣམས་སྦུག་སིལ་རྔ་དུང་ཆེན་གྱིས་གཙོས་པའི་རོལ་མོ་གནམ་ས་འགས་པ་ལྟ་བུས་ཡར་སྤྱན་དྲངས་ཏེ་ཁྱམས་རར་འཁོར་ལུགས་སྔར་སྲོལ་ཇི་ལྟ་བ་ལ། རྗེ་བླ་མའི་དྲུང་དུ་ཁད་ཉེར་སླེབས་པའི་ཚེ་ཤེས་པ་རང་བཞིན་དུ་གནས་པའི་མིས་འབག་ཕོད་གྱོན་པར་ཁུ་འཁྲིས་ཡོང་དོན་མི་འདུག་རུང་ཞལ་བརྙན་གྱི་ཡེ་ཤེས་པའི་ནུས་པ་འཇུག་གི་ཡོད་པ་ཞིག་ཡིན་ནམ་རྗེའི་དྲུང་དུ་འགྲོ་བ་ལ་འཇིགས་པ་ལྟ་བུའི་འགྲོ་མ་ནུས་པར་ཚོ་འཐེན་བྱས་པའི་ངང་ནས་རིམ་གྱིས་འོང་ཏེ་མགོ་བོས་བཏུད་པ་ན། འཇམ་དཔལ་དྲག་པོར་ཁྲོས་པའི་ང་རྒྱལ་གྱི་དཔའ་གདེངས་ནང་དུ་ཤར་བའི་ཕྱི་རོལ་ཏུ་སྐུ་མདངས་དམར་སྨུག་ཏུ་གྱུར། གདུང་ཤུགས་དྲག་