[A:༤༡༦] བླ་ཆེན་གཤེགས་ནས་གྱི་ཇོ་ལོ་ཙཱ་བས་གདན་དྲངས་ཁོང་ལ་གསུང་ངག་ཀྱང་གནང༌། གཉོས་ཡོན་ཏན་གྲགས་ཀྱིས་གདན་དྲངས་དེར་པཎྜི་ཏ་ལ་འཆི་ལྟས་བྱུང་བས་མཁའ་རེག་ཐོད་ཕུར་འབྲོག་མིའི་སློབ་མ་སེ་རོག་གཉིས་ཡོད་སར་ཕེབས། གཤེགས་པའི་ཚེ་དབུ་གཙུག་ནས་འོད་དཀར་པོ་རྫ་མ་ཙམ་གྱི་ནང་ནས་རྣམ་ཤེས་ཀྱེ་རྡོར་ཞལ་བརྒྱད་པ་རྐང་གང་ཙམ་ཞིག་སྒྲ་འོད་མེ་ཏོག་གི་ཆར་དང་བཅས་ནུབ་ཕྱོགས་སུ་སོང་བའི་ངོ་མཚར་བ་དེ་འདྲ་བོད་དུ་སུ་ལའང་མ་བྱུང་ཞིང༌། མཁས་གྲུབ་ཀྱི་ཡོན་ཏན་ནི་བསམ་གྱིས་མི་ཁྱབ་བོ།། ༈ ལྔ་པ་མཁས་གྲུབ་ཁྱུང་པོ་ནི། འགྲོ་མགོན་སངས་རྒྱས་སྟོན་པ་ཡིན་པར་ཚར་ཆེན་ཉིད་ཀྱིས་ཞལ་གྱིས་བཞེས་ཤིང་སངས་རྒྱས་སྟོན་པ་ནི་ཁྱུང་པོའི་སྐྱེ་བར་གྲགས་པས། རྗེ་བཙུན་བོད་མཁར་བ་ཆེན་པོའི་རྣམ་ཐར་དུ། སྔོན་གྱི་དུས་ན་མཁས་གྲུབ་ཁྱུང་པོ་དེ། །བདག་སོགས་དམུ་རྒོད་འགྲོ་ལ་བརྩེར་དགོངས་ནས། །དུས་འདིར་ཚར་ཆེན་རྡོ་རྗེ་འཆང་དུ་གྲགས། །བདག་སོགས་གདུལ་བྱའི་རེ་བ་སྐོང་དེར་འདུད། །ཅེས་པ་ཡིད་བརྟན་གྱི་གནས་ཁོ་ནར་ངེས་པའི་ཕྱིར། ཁྱུང་པོ་ཉིད་ཀྱི་གསུང་ལས། བན་ཆུང་བདག་གི་སྐྱེས་ས་གངས་དཀར་མདའ། །སྙེ་མོ་ར་མང་རྗེ་རིགས་ཁྱུང་པོ་ཡིན། །ཕ་རུ་སྨོས་པ་ཁྱུང་རྒྱལ་སྟག་སྐྱེས་དང༌། །མ་རུ་སྨོས་པ་མགོ་བཟའ་བཀྲ་ཤིས་སྐྱིད། །དེ་ཉིད་རུམ་དུ་བདག་ཉིད་ཞུགས་པའི་ཚེ། །ཕ་མ་ཡུལ་མི་བདེ་སྐྱིད་ལྡན་པར་གྱུར། །སྟག་གི་ལོ་ལ་མ་ཡི་རུམ་ནས་བཙས། །ཞེས་པ་ལྟར་ཡུལ་སྙེ་མོ་ར་མང་དུ་ཡབ་ཁྱུང་པོའི་རིགས་སྟག་སྐྱེས། ཡུམ་བཀྲ་ཤིས་སྐྱིད་ཀྱི་སྲས་སུ་སྐུ་བལྟམས། ལོ་བཅུ་ལོན་ནས་ཡིག་རྩིས་མཁས་པར་ཤེས། བཅུ་གཉིས་ལོ་