[A:༥༥༡]མང་ལ་དངོས་མ་གཙང་བ་མྱོག་པ་ཞིག་དང༌། འཇིག་རྟེན་གྱི་དཔོན་ཆེན་དང༌། དཔོན་ཆུང་དང༌། ཡང་ཆུང་སོགས་ཆོས་བརྒྱད་གོང་འཕེལ་གྱི་བྱ་བ་ལྷུར་ལེན་པ་འདྲ་བ། ཁོང་རང་གི་བརྒྱུད་པའི་བླ་མ་དང་དེ་དག་གི་གསུང་རབ་རྣམས་ལ་ཆས་ཆོས་རས་སུ་བོར་རེ་བ། དེང་སང་ཀརྨ་པ་རང་གི་བཤད་སྒྲུབ་ཀྱི་བསྟན་འཛིན་ཅུང་དྲག་པ་རྣམས་ལའང་སྨོད་ཅིང༌། དེ་དག་གི་གྲ་རིགས་དྲག་པ་ཚུན་ཆད་ཁོང་རང་གི་ཕྱག་ཕྱིར་གང་ཁུགས་བྱེད་པ་སོགས་འདུག་ཟེར་བས། སྙིང་ནས་དད་པ་ལྡང་བ་ནི་མ་སྐྱེས་བྱུང༌། དེ་ཕྱིན་ངེད་རང་ས་སྐྱ་པའི་བཟའ་རྐང་མ་གཏོགས། ཀརྨ་པའི་ཁྲལ་འབབ་ཀྱི་ཁུར་ནི་ཅི་ཡང་མེད། དེང་སང་གི་མི་ཕལ་ཆེར་གྱི་བྱེད་པ་ལྟར། སྡེ་དཔོན་དཔོན་སྐྱ་ཞིག་གི་བླ་མ་བཅོལ་འདུག་ན་ཅིས་ཀྱང་ཆོས་ཞུ་སྙམ་པ་དང༌། མཐའ་མི་མང་གིས་སྐོར་འདུག་ན་སངས་རྒྱས་ཡིན་སྙམ་རྒྱུག་པའི་བླུན་པོ་ནི་ངེད་རང་མིན། རང་གི་དགོན་ཆུང་ལ་མང་ཇ་འགྱེད་བཅས་ཡོད་དམ་སྙམ་པ་དང༌། གཞན་དགོན་ཆུང་ངམ་གྲྭ་རིགས་རེ་རེ་ཙམ་འབྱོར་རེ་བའི་ཆེད་དུ་ཆོས་འབྲེལ་ཞུ་བའི་ལྟོགས་ལ་མེ་འབར་གྱི་བླ་མ་སློབ་དཔོན་ནི་མིན། ལེགས་ལེགས་ཀྱི་ཁྲལ་འཇལ་ནི་བྱེད་དོན་མི་འདུག །ལར་རྗེ་བཙུན་རྡོ་རིང་པ་ཆེན་པོ་དང་མཇལ་ནས་གསུང་ངག་རིན་པོ་ཆེ་འདི་ཐོབ་མན་ཆད། གཞན་བླ་མ་དང་གདམས་ངག་གང་ལའང་བྱང་ཆུབ་སྒྲུབ་པའི་ཆེད་དུ་མི་སྨོན་ཞིང༌། འགྲམ་ཆུ་མི་ལྡང་བའི་ངེས་ཤེས་གཏིང་ཚུགས་ཤིག་ཡོད་པས་ལམ་གཞུང་བསྲངས་ཕྱིན། འོན་ཀྱང་རྗེ་ཐམས་ཅད་མཁྱེན་པ་ཀརྨ་འཕྲིན་ལས་པའི་ཞབས་འབྲིང་དུ་ཀརྨ་པའི་ཟབ་ཆོས་མང་པོ་ཐོབ་པས། ཀརྨ་པ་སྔོན་མ་རྣམས་ཀྱི་སྐུ་སྐྱེ་ཡིན་