[A:༥༤༦] ངེད་རང་གི་རྐང་ཚབ་ཀྱི་རྟ་དེ་ཡང་བབས་ཀྱི་རྣམ་པ་ཡོད་པ་ཞིག་བྱུང་བ་སོགས་ཕྱོགས་དུ་མ་ནས་མདོར་བསྟན་པས་འཕྲེད་ལ་བཅད་དེ་རོང་ཆུང་ལ་འགྲོ་བའི་གྲོས་ཐག་བཅད་དོ། །བོད་རྒྱལ་པོ་གཞོན་ནུས་གཙུག་གིས་མཆོད། །ཤར་རྒྱལ་པོའི་མཛད་པས་ཡིད་རབ་ཕྲོགས། །རྟ་མདོ་ཕྲུག་གི་བར་འགྲོས་དེ་རུ་ཟད། །ཁོང་གྲྭ་པ་ཀུན་ཟ་ཐག་ཉེ་ལ་དགའ། །དཔལ་ར་ལུང་གི་རི་ཁྲོད་ལྟ་བ་དང༌། །ཕ་ངག་དབང་ཆོས་རྒྱལ་མཇལ་སྙམ་ཚེ། །ལུས་འཁོས་མེད་ཀྱི་རྐང་པས་རང་མཚང་བསྟན། །ང་ལུགས་གཉིས་ཀྱི་བླང་དོར་མི་ཞན་ཀྱང༌། ལུས་རྐང་པའི་འཁྲུལ་འཁོར་འདོར་ལེན་བྲལ། །ཁོང་དུད་འགྲོ་ལ་འགྲོ་འདུག་གི་སྐྱབས་གནས་འཆོལ། །ང་མི་ཕྱེད་དུ་འདུག་སྙམ་སྙིང་ཁོང་གྲང༌། །ང་ཡང་ཅིག་བསམས་པ་འདི་ལྟར་ཤར། །གནས་ལུགས་ལ་ལྟ་བའི་མིག་ཡོད་ན། །ཆུ་བུར་གྱི་ཁྲ་ཧྲིག་མེད་ཀྱང་ཆོག །ཅི་བསམ་ཀུན་འགྲུབ་པའི་བློ་ཡོད་ན། །ཤ་རུས་ཀྱི་རྐང་པ་མེད་ཀྱང་ཆོག །སེམས་ཉིད་ཀྱི་ཡང་དགོན་མཐོང་ཙ་ན། ར་ལུང་གི་རི་ལྟས་དེ་གར་གདའ། །དད་མོས་ཀྱི་རང་ཞལ་མཇལ་ཙམ་ན། །མཚན་ལྡན་གྱི་བླ་མ་དེ་གར་གདའ། །གང་བྱུང་གི་ཆོག་ན་ཅི་བྱས་བདེ། །བྱ་བཏང་གི་བློ་སྣ་གང་ཤར་ཡིན། །འགྱུར་མེད་ཀྱི་བདེན་གྲུབ་མེད་པས་འཚེངས། །རོང་ཆུང་ལ་སྤྲང་པོའི་ལམ་སྣ་ཟུག །དཔལ་འཁོར་བདེ་ཆེན་དུ་བསྡད་པའི་དགོངས་དེ། ངེད་ནི་གནས་ཆེན་པའི་མཁར་ལས་བྱེད་སྒང་གི་ནང་འུ་ལག་པ་དང་ཐུག་ཆོམ་གྱི་ཁེངས་པ་དེར་ནན་མེད་བྱས་སྒོར་བས་ཞེ་སུན་ལ་ཚིག་པ་ཟ། ཟླ་བོ་རྣམས་ནི་དེའི་ནུབ་ཆར་ལྷགས་འདྲེས་པ་ཞིག་གིས་ལྕོག་བུ་རྣམས་བསྒྱེལ། འདམ་བག་གི་དཀྱིལ་དུ་ཉལ་དགོས་