[A:5a-199] / /khyod rang la chos rgyags dgos gsung ma bzhes pa la/ bdag la chos rgyags re sa cig yod bzhes par zhu zhus pas/ khyod mi rgod rang yin re sa ga na yod shod gsung ba la/ nga rab tu 'phags pa la gdams ngag zhus/ nyams rtogs skyes nas 'chi ba la re ba yin/ de ma thub na sprang ba la re ba yin zhus pas/ 'o snying stobs de 'dra cig chos byed pa la dgos pa yin/ rnal 'byor pa grub thob gcig gyan 'dug go ang gsung zhing / bla mas A~MHhUM mngon sum/ gsang skor rje btsun ma'i khrid la sogs pa btab/ lo bcu bzhir dka' ba spyad de bsgoms pas chags med zhen med kyi rnal 'byor chen po cig byung/ yang bla ma'i zhal nas/ khyod kyi skye ba mang po'i bshes gnyen zhig po bdud rtsi bya ba dbus na bzhugs pa/ der song gsung ba'i lung bstan gnang ba bzhin/ lha sa bskor mi dang bsdebs byon pas/ bzad du bla ma zhig po dang mjal dgyes pa'i rnam 'gyur du ma bstan te/ bsnyan brgyud skor gsum/ a ro'i gdams ngag la sogs pa gnang te/ dbyar thog cig bzad phu'i ri la gcong zhi'i dka' thub mdzad cing bsgoms/ dgun zhang mtshal pa zhig pos spyan drangs pa dang mjal/ dbang dang gdams pa mang po gsan/ slar yang sribs sha ru'i 'phrang gi phug par lo nyi shu rtsa bzhi'i bar du sgrub pa'i dam bca' mdzad