[A:༡༡༨] ཤིན་ཏུ་མཁས་པ་ཤེས་འདུག།
དེ་བཞིན་དུ་གསང་འདུས་འཕགས་ལུགས་ཀྱི་བརྒྱུད་པའི་ལོ་རྒྱུས་དང་། དོ་ཧ་སྐོར་གསུམ་གྱི་བརྒྱུད་པའི་ལོ་རྒྱུས་རྣམས་ལས་ཀྱང་། ཟླ་གྲགས་ཀླུ་སྒྲུབ་ཀྱི་ཞབས་ཟིན་དུ་བྱས་པའི་ལོ་རྒྱུས་ཁོ་ན་སྣང་། འོན་ཀྱང་རིགས་པའི་ཁུ་བྱུག་ཟླ་གྲགས་ཀྱིས་ཞབས་ཟིན་ཡིན་ལ། ཨ་ཏི་ཤ་རིགས་པའི་ཁུ་བྱུག་གི་དངོས་སློབ་ཡིན་ཞིང་། ནག་ཚོས་ཇོ་བོ་སྤྱན་འདྲེན་ལ་ཕྱིན་པའི་ཚེ་ཡང་། རིགས་པའི་ཁུ་བྱུག་བཞུགས་པ་རྣམ་ཐར་དང་ལམ་ཡིག་དག་ན་གསལ་བས། དེ་དག་གི་ལོ་གྲངས་རྩིས་ན་མངོན་སུམ་དུ་མི་འགྲིག་པ་ལྟར་སྣང་སྟེ། ས་ལུགས་ཀྱི་བསྟན་རྩིས་ལྟར་ན། ཨ་ཏི་ཤ་འདས་ལོ་ནས་ལོ་སུམ་སྟོང་ལྷག་ཙམ་འདས་པའི་ཚེ་བྱོན་པར་མངོན་སུམ་གྱིས་གྲུབ། ཀླུ་སྒྲུབ་འདས་ལོ་ནས་ལོ་བཞི་བརྒྱ་ཨོན་པའི་ཚེ་བྱོན་ནས་ལོ་དྲུག་བརྒྱ་བཞུགས་ཟེར་བས། འདས་ལོ་ནས་ལོ་སྟོང་འདས་པའི་ཚེ་ཀླུ་སྒྲུབ་མི་བཞུགས་པར་ཁས་བླངས་པའི་རྟགས་གྲུབ། དེ་ནས་ཟླ་གྲགས་ཀྱིས་ལོ་ལྔ་བརྒྱ་བཞུགས་ཟེར་བ་དང་། རིགས་པའི་ཁུ་བྱུག་གིས་ལོ་སུམ་བརྒྱ་བཞུགས་ཟེར་བ་རྣམས་རྩེ་མཐུད་ནས་ཀླུ་སྒྲུབ་ཟླ་གྲགས་རིགས་པའི་ཁུ་བྱུག་གསུམ་གྱི་ལོ་གྲངས་ཀྱང་། འདས་ལོ་ནས་སུམ་སྟོང་དུ་སླེབ་པ་ལ་ལོ་སྟོང་དང་ཉིས་བརྒྱས་ཆད་པས། ཨ་ཏི་ཤ་དང་། རིགས་པའི་ཁུ་བྱུག་དུས་མི་མཚུངས་པའམ། ཟླ་གྲགས་དང་ཀླུ་སྒྲུབ་དུས་མི་མཚུངས་པས་གང་འོས་ཤིག་ཏུ་ཁས་བླངས་དགོས་བྱུང་བའི་ཕྱིར་རོ། ཡང་རིགས་པའི་ཁུ་བྱུག་གཉིས་སུ་བྱས་པའི་ཆུང་བ་ཇོ་བོའི་བླ་མར་བྱས་ན་འགྲིག་ཙམ་ཡོང་བར་སེམས་སོ། དེས་ན་ཁོ་བོ་ནི་ལུང་རིགས་ཀྱི་ལེགས་བཤད་སྔར་བཤད་པ་ལྟར། ཀླུ་སྒྲུབ་ཀྱི་ལོ་དྲུག་བརྒྱ་ལས་ཆེས་ལྷག་པ་ཞིག་བཞུགས་པའམ། ཡང་ན་དག་པའི་སྣང་བ་ཁོ་ནས་ཞལ་མཇལ་