[A:71a]yin te/ blo dman rnams ni mos par dka'o/ /don 'di la dgongs nas chos rje pas nyid kyi sku tshe'i 'du byed gtong ba'i tshe'ang / mgon po khyod kyi gsung rab mchog /nan tan gyis ni bka' stsal pa/ /'bad pas ci nus bsgrub pa'i tshe/ /bar du gcod pa'i chos de sgrol/ /de nas ji skad gsungs pa yi/ /bka' stsal de dag bcings pa bzhin/ /rnam pa kun tu thog tu babs/ /bden gsungs khyed la bdag skyabs mchi/ /zhes gsungs so/ /des na byang ngos su byon pa la yang gzhan gyi snang ngor 'byon pa mi spro pa'i tshul bstan pa sogs rnam par thar pa 'ga' zhig tu 'byung mod kyi/ don ni gzhan don rgya che ba'i rten 'brel zab mo mkhyen bzhin du byon pa ste/ do skor ba'i dris lan las/ bdag kyang sngon gyi byed pa 'ga' yi rgyus/ /bstan pa'i nyi ma shar gyi phyogs su shar/ /thos bsam sgom pa yid bzhin nor bu des/ /dad ldan dbus gtsang re ba myur du rdzogs/ /zhes gsungs pa'i phyir ro/ /de nas dgung lo drug cu rtsa lnga bzhes pa'i dus su me pho rta'i lo zla ba brgyad pa la byang phyogs ling chur gdan phebs te/ de'i dus su rgyal po go dan/ go yug gan rgyal sar ston pa la hor yul du bzhud nas tshur byon pa dang lug lo zla ba dang po la mjal/ rgyal po yang shin tu mnyes nas chos dang 'jig rten lugs kyi gsung gleng mang po mdzad par gda'/ de'i gong du rgyal po'i drung du bod kyi bande 'ga' 'dug pa la/ sangs rgyas kyi chos kyi yon tan gyi khyad par gang yang bskyed par ma nus so/ /smon lam 'debs pa la dbang bar khas len pa la