[A:65b]lhun gyis grub pa'i gnas chen 'dir/ /zab cing rgya che'i chos rnams bshad pa las/ /byung ba'i dge ba'i rtsa ba gang yod des/ /'gro ba srid pa'i mtsho las grol bar shog /ri bong 'dzin pa bsil ba'i 'od zer can/ /mtshan mo sa dang nam mkha' gsal byed pa/ /log blo'i rgyu skar tshogs rnams zil mnan nas/ /me tog kunda'i tshogs rnams kha 'byed byed/ /tshigs su bcad pa 'di rnams bla ma chos kyi rje sa skya paNDi ta chen pos bsam yas lhun gyis grub pa'i gtsug lag khang chen por/ mkhas pa rnams kyi gtsug gi nor bu slob dpon chen po kA ma la shI la'i chos kyi gdan seng ge'i khri bshams pa ga la ba der bzhugs nas/ zab pa dang rgya che ba'i gdams pa'i chos kyi 'khor lo bskor zhing / bstan pa rin po che'i byi dor dang / skye dgu'i tshogs rab tu mang po'i don mdzad pa nyid kyis thugs cung zad rangs par gyur cing / sngon gyi dam pa de dag gi rnam par thar pa dang rmad du byung ba'i 'phrin las dgongs shing mngon sum du gzigs la/ dus kyi 'gyur bas skye dgu'i tshogs ma rungs par gyur par mkhyen pa'i dbang gis thugs cung zad gdung bar gyur yang / slad nas 'jig rten gyi chos kyis skye dgu'i bde legs su gyur cig snyam du dgongs te/ gtsug lag khang gi 'khor sa'i ngos ji ltar rigs pa'i gzhi dag la/ nyid kyi phyag g.yas pa rin po che mngon par brkyangs nas/ yi ge'i 'du byed mngon par 'du mdzad nas phyag rgya'i dbyibs las ri mo'i gzugs brnyan gyi tshul gyi rgyud de dag gi sug tu gsal bar phyogs gcig tu bsgrigs pa ni gang gis mthong