[A:24]སོགས་གནང་ཡང་སྐུ་ཁམས་དུབ་པ་ཙམ་ཡང་མ་བྱུང་ཞིང། དེར་གསང་ཕུ་བའི་མིག་མཐོང་པ་འགའ་རེའི་ལབ་བརྗོད་ལ། དབོན་ཆུང་འདི་ལ་ཆོས་སྐྱོང་ལྕམ་སྲིང་གིས། ཉིན་རེ་ལ་སྐུ་ཁྲུས་ལན་གསུམ་གསུམ་འབུལ་བ་འདུག། འགོ་ནད་སོགས་བར་ཆད་གང་གིས་ཀྱང་མི་བརྫི་ཞེས་ཀྱང་གཏམ་དུ་བཞག་ཅེས་སྔར་བརྗོད་པའི་ཚད་སྟོན་ཚུལ་ཁྲིམས་དཔལ་མཆོག་གིས་དེ་དུས་ཇི་བཞིན་རྟོགས་པའི་ངག་སྒྲོས་རབ་གསལ་ཟླ་མགོན་བརྒྱུད་པ་ལས་སོ༎
དེ་ནས་སྟོན་གྲྭ་ཚང་ཀུན་འཕན་ཡུལ་དུ་ཐེགས་ཤིང། རྗེ་དོན་ཡོད་དཔལ་དང་དཔོན་སློབ་དྲུང་གིས། ནཱ་ལེནྡྲར་རོང་སྟོན་ཤེས་བྱ་ཀུན་རིག་མཇལ་བ་ལ་ཐེགས་པས། རྗེ་ཉིད་ཀྱིས་མཛད་པའི་འབུམ་ཊཱིག་གི་ལུང་རྫོགས་པའི་དེའི་ཉིན་ནས། ཞུ་བ་པོའི་གཙོ་བོ་མཁན་ཆེན་པདྨ་བཟང་པོ་དང། དགས་པོ་བཀྲ་ཤིས་རྣམ་རྒྱལ། ཆོས་རྗེ་དགེ་བ་རྒྱལ་མཚན་པ་གསུམ་གཙོ་བོར་བཞུགས་པའི་དགེ་བའི་བཤེས་གཉེན་འབའ་ཞིག་པའི་ཚོགས་པ་ལ། བརྒྱད་སྟོང་པ་སློབ་དཔོན་སེང་གེ་བཟང་པོའི་བརྒྱད་སྟོང་འགྲེལ་ཆེན་དང་སྦྱར་བའི་བཤད་པ་གནང་བའི་དུས་དང་འཛོམས་ནས་རྗེ་དོན་ཡོད་དཔལ་དང་དཔོན་སློབ་གཉིས་ཀས་གསན། དེ་རྫོགས་མཚམས་ཀ་མ་ལའི་སྒོམ་རིམ་ཐོག་མཐའ་བར་གསུམ། རྗེ་ཉིད་ཀྱི་ཊཱིཀ། དང་བཅས་པའི་མཐའ་བཅད་དང། དབུ་མ་རིགས་པའི་ཚོགས་དྲུག། བཤེས་སྤྲིངས། གཏམ་བྱ་རིན་ཆེན་ཕྲེང་བ། ཕར་ཕྱིན་ཁྲིད་ཡིག་སོགས་ཁྲིད་ཡིག་ཐོར་བུ་རོང་ཆེན་ཉིད་ཀྱིས་མཛད་པ་ཀུན་གྱི་ལུང་ཡང་དེ་དུས་རང་ཐོབ་གསུང་ཞེས་རྗེ་རོང་པའི་བཀའ་འབུམ་ཡོངས་རྫོགས་ཀྱི་ལུང་ཡོད་པ། ནཱ་ལེནྡྲའི་གཟིམ་ཁང་འོག་མའི་འཆད་ཉན་སློབ་དཔོན་ཕྲིན་ལས་པ་ཞུ་བ་ལ། བདག་གིས་རོང་པོའི་བཀའ་འབུམ་ཞུ་བའི་སྙན་ཞུས་ལ་ཕྱིན་པས། ཁོང་གི་སྤྱན་ལོང་ཞིང་དཔེ་ཡང་མ་རནཇེད་པས་འདོད་དོན་མ་བྱུང་ལ། གཏམ་དེ་དག་དེར་ཐོས་སོ༎
དེ་སྐབས་རོང་སྟོན་ཉིད་ཀྱི་ཕྱག་གིས་རྗེ་འདིའི་དབུ་ལ་བྱིལ་བྱིལ་གནང། བུ་ཁྱོད་ཀྱིས་ཕ་ངའི་རྣམ་ཐར་བཟང་པོ་ལེགས་པར་ཟུང་ཞིག་ཅེས་