[A:207]པའི་གྲལ་ལ་འཁོད་པ་ཀུན་གྱིས་སྒྲོག་ཅིང། དེ་ནས་སླར་གསེར་མདོག་ཅན་གྱི་ཆོས་གྲྭ་ཉིད་དུ་ཕེབས་ནས་དགུན་ཆོས་ཀྱི་དུས་ཆོས་སྐྱོང་བར་མཛད་སྐད་དོ༎ ་༎
སྔོན་རབ་མཁས་པ་ཡོངས་ཀྱིས་མ་གཟིགས་པའི༎
ལེགས་བཤད་གཞུང་ཚིག་ལ་གནས་མངོན་སུམ་པ༎
ཆོས་སྤྱན་ཡངས་པས་ཕྲ་རྒྱས་སྤུ་རིས་ཀྱང༎
མ་འདྲེས་གསལ་བའི་ཡུལ་དུ་ལེགས་པར་དགོངས༎
རང་བཞེད་ལུང་དང་རིགས་པའི་དམག་དཔུང་གིས༎
གཞན་ཟེར་ལུང་རིགས་ལྟར་སྣང་སུན་ཕྱུང་བ༎
ཁྱོད་ཀྱིས་ལེགས་སྨྲས་མཁས་པའི་ཁ་རྒྱན་གྱིས༎
བསྟན་བཅོས་གང་དེ་བསྟན་པའི་ནོར་རྫས་ཉིད༎
རྒྱལ་བའི་བཀའ་དང་དགོངས་འགྲེལ་བསྟན་བཅོས་དག༎
གཞུང་ཚིག་ཡི་གེ་ཉིད་ལ་རབ་དཔྱད་ནས༎
འདི་དེའི་དགོངས་པ་འདི་ལྟ་ཉིད་ཡིན་ཞེས༎
བདེན་གསུངས་ལྗགས་ལས་དག་གསལ་འདོམས་པར་གསུངས༎
ཀརྨ་པར་གྲགས་བདུན་པའི་བཀའ་ཡི་འཕྲིན༎
རབ་ཆགས་ཐུགས་རྗེའི་ལྕགས་ཀྱུས་ཡོངས་བསྐུལ་བས༎
ཡོངས་རྫོགས་བསྟན་པའི་ཁུར་ཁྱེར་གླང་པོ་ཁྱོད༎
སྲིད་དང་ཞི་བའི་ཕུན་ཚོགས་དབུས་དེར་བྱོན༎
བཤད་མཁས་གང་གིས་ཆོས་དོན་སྒྲར་བསྙད་ཚེ༎
ཉན་མཁས་སྙིང་ལ་ཟིམ་ཆར་བཞིན་དུ་འབབ༎
སྨྲ་མཁས་ཡོངས་ཀྱིས་ཆེད་དུ་སྒྲོག་པའི་གཞི༎
བརྗོད་མཁས་དོན་བཟང་རྒྱལ་བའི་བཀའ་དང་མཚུངས༎
ཁྱོད་གསུང་ལེགས་བཤད་ལྷ་ཡི་རྔ་བོ་ཆེ༎
ཐོས་པས་མ་རིག་གཉིད་ལས་རབ་བསླང་ཞིང༎
རབ་སྙན་ལྷ་རྫད་པི་ཝཾ་གླིང་བུའི་སྒྲ༎
ཡུན་རིང་རྣ་བའི་ལམ་ནས་སྙིང་དབུས་བཞུགས༎
ཚིག་དང་དོན་དུ་བཅས་པའི་ངེས་གསང་ནི༎
རྒྱལ་བའི་ཆོས་རྣམས་ཡོངས་ཀྱི་བཅུད་བསྡུས་པ༎
གཅིག་ཤེས་ཀུན་གྲོལ་འཆད་མཁས་འཕྲུལ་གྱི་སྒོ༎
དུས་དེར་ལེགས་ལམ་སྒོ་བརྒྱ་དབྱེ་བར་མཛད༎
ཅེས་པཎྜི་