[A:160]ལྟད་མོ་དང་རྗེས་འབྲེལ། དེ་ཉིན་མན་ཤཱཀ་དབང་མ་བརྒྱ་རྩ་རེ་འདོན་པའི་དམ་བཅའ་ནམ་གཤེགས་བར་མ་ཆག་ཅིང། དེར་སློབ་མ་མཐིལ་ཕྱིན་དམ་ཚིག་གཙང་མ་རྣམས་ལ་དངོས་སུ་བཀའ་ལུང་བྱོན་པ་ལ་ཡང། ངེད་རང་གི་ལམ་དུས་དེ་ཤཱཀ་དབང་མ་འདོན་པ་འདི་རང་ཡིན་གསུང་ཞིང། ཕྱིས་དྲུང་བཙུན་ཤེས་རབ་དཔལ་འབྱོར་བ་གཤེགས་པའི་སྐུ་གདུང་ཞུགས་འབུལ་བྱས་དུས། དབུ་ཐོད་ལ་ཤཱཀ་དབང་མའི་ཡི་གེས་བསྐོར་བ་འཁྲུངས་ཏེ། ལམ་ཐམས་ཅད་བླ་མའི་མོས་གུས་གྱིས་རྫོགས་པ་ཞིག་ཡིན་ལ། དྲུང་བཙུན་རིན་པོ་ཆེ་བ་འདི་ལ། བདག་གིས་མའི་ལྟོར་གནས་པ་ནས་བཟུང་སྟེ། ལོ་ཉི་ཤུ་རྩ་དྲུག་འགྲོ་བའི་བར་ཞབས་བརྟེན་ནས། པཎ་ཆེན་རིན་པོ་ཆེ་ནས་བརྒྱུད་པའི་དབང་རྗེས་གནང་གྲངས་མེད་པ་ཐོབ་བོ༎
དེ་ལྟར་དེ་ལྟ་བུའི་ཚུལ་རང་གི་མཆེད་གྲོགས་མཆོག་དྲུང་ཡིག་ཆོས་རྒྱན་པ་ལ་བཤད་པས། ཁོང་ན་རེ། དེ་ཀ་ཡིན་ན་ནིང་ཅིག་གཞིས་ཀར་སྡེ་བདག་དོན་ཡོད་རྡོ་རྗེ་ལ་གཤེད་དམར་གྱི་དབང་བསྐུར་ཞིག་གནང་དུས། འཕྲལ་གྱི་གཟིམས་ཆུང་བ་ལ་གཡག་སྡེ་དཔེ་ལུང་བའི་དཔོན་ཆུང་དེ་བསྐོས་འདུག་ཅིང། ཁོང་གིས་སྔར་གཡག་སྡེ་སེ་པའི་ཞལ་ངོ། བོ་དོང་པ་ཡིན་པའི་མཁས་མཆོག་ཡོན་ཏན་རྒྱ་མཚོ་ཟེར་བ་དེ་ཀུན་གྱིས་ཕྱག་གཡོག་བྱས་འདུག་ཅིང། ཁོང་དབང་བཀའ་གང་གནང་ལ་སྤྲོས་སྤྲོས་ཀྱིསཀྱི་ས?་ཆོ་ག་སོགས་མཛད་པའི་མིགམི་ག?་རྒྱུགས་བྱས་ནས། སྡེ་པའི་དྲུང་དུ་པཎ་ཆེན་རིན་པོ་ཆེ་མདོའི་མཁྱེན་རབ་ནི་འབྱམས་དབྱངས་དངོས་ཡིན་ངེས་སུ་འདུག། སྔགས་རང་མི་མཁྱེན་པ་འདྲ། དབང་གནང་བ་ལ་ས་ཆོག་གི་གར་སོགས་ཀྱང་མཛད་རྒྱུ་མི་སྣང་ཞུས་པས་བདེན་དགོངས་སྡེ་པའི་དྲུང་གིས་ཀྱང་ཅོ་འདྲིའི་ཚུལ་དུ། ཞབས་དྲུང་འདི་ནས་དབང་ལ་ས་ཆོག་སོགས་མི་མཛད་ཡོད་ལགས་སམ་ཞུ་ཡིན་འདུག་པ་ལ། པཎ་ཆེན་རིན་པོ་ཆེའི་བཀའ་ལུང་ལ།