[A:160]
on kyang pan chen shing glang la bltams nas/ go dgu la 'das pa'i lo de ni/ chu mo yos kyi lo yin pas/ khro los/ bya lo sgrog zla'i dkar phyogs kyi zhes sogs bshad pa ni yi ge ma dag pa'o zhes khas blangs dgos te/ gzhan du na kha che pan chen gyi bstan rtsis dang 'gal ba'i phyir ro/
mdor na kha che pan chen gyis bod du lo bcu gcig bzhugs/ mdo sngags kyi bstan pa la phan che/ sa panDi ta dang byang rdor gnyis la bsnyen rdzogs kyi sdom pa gnang / shangs pa jo gdan dang / seng ge zil gnon la me tog 'phreng rgyud sogs rgyas par gnang / 'dul ba stod smad gnyis kyi steng du/ 'dul ba'i brgyud pa zur pa zhig kyang spel/ slob bu mang du byung yang sa panDi ta kho na sras kyi dam par mdzad/
de yang 'dul ba smad 'dul ba'i sdom brgyud ni/ thub dbang / shA ri'i bu/ sras sgra gcan zin/ bram ze sgra gcan zin/ klu sgrub/ legs ldan byed/ dpal sbas/ ye shes snying po/ zhi ba 'tsho/ dba' ratna/ gtsang rab gsal/ bla chen dgongs pa rab gsal/ klu mes tshul khrims shes rab sogs yin la/ stod 'dul ba'i sdom brgyud ni/ dharma pA la/ pradznya pA la/ zhang zhung rgyal she/ dpal 'byor shes rab/ zhing mo che ba byang chub seng ge/ yang rtse ba rdo rje seng ge/ stag pa padma g.yung drung / rtsis 'dul thugs rje byang chub/ bde ba can pa shAkya byang chub/ kun dga' rgyal mtshan/ byang chub seng ge/ byang chub bzang po/ blo gros rgyal mtshan/ dpal ldan bla ma/ mdog lho pa mkhas chen kun dga' dpal bzang po/ red mda' ba sogs so/