[A:436]'brog dang rgyang 'brog ste 'brog gi dge zhes dge bcu'i yon tan yongs su tshang ba'i yul chen po 'di nyid la bod skyong ba'i rgyal po mes dbon gyi dus dbu ru dang g.yo ru/ g.yas ru dang ru lag ces ru bzhir bshad cing / tshal pa si tu'i deb dmar du sa hor mchod yon gyi dus gong ma'i lung gis phyed gsal chen mo byas skabs chu mig khri skor gyi sa'i char gtogs pas/ gsol 'debs las/ dus 'dir mtho ris phun tshogs rgyas pa'i grong / /dpal ldan rmu zhes rab grags bsti gnas su/ /rigs rus mngon mtho'i skal bzang yab yum gyi/ /sras su dge bar 'khrungs la gsol ba 'debs/ /rje btsun yum gyi ye shes gsal snang du/ /dpal gyi 'dab rgyas gtor ma'i 'dzum dkar las/ /ayon sku brnyan thugs kar thim pa dang / /rgyal ba'i mchod rten gzigs la gsol ba 'debs/ /zhes pa'i bye brag yul ni rdo rje gdan nas dpag tshad brgya bgrod pa na grum stod dpal ldan sa skya/ de las ha cang gis mi ring ba mu ku ta zhes bod skad du rnam par grol ba ste tshe gcig la grol lam rnyed pa'i gdams pa gsung ngag rin po che bod 'dir thog mar byung ba'i gnas dang 'dabs chags pa/ 'phags pa don yod zhags pa'i sku rang byon bzhugs pa'i sa'i cha/ ba da ra'i gling bgrod kyi rtogs pa brjod pa'i yal 'dab tu/ rtse mo shin tu mtho ba yi/ /shel gyi sa gzhi mdun du mthong / /bya rnams kyis kyang bgrod dka' ba/ /'jam pa'i brag ni gcig pu der/ /zhes shin tu mtho ba'i brag ri dang spang ljongs gangs kyi rdul mang yongs su brtsegs pa las snyan pa'i sgra lhung lhung du sgrog pa'i chu'i lha mo dbu ba'i do shal dkar po ring du 'phyang