[A:608]g.yabs steng du bzhugs/ mchod dpon gyis thugs dam gtor ma bshams phyag dril sogs phul kyang spyan mkha' reg shar gyi ri rtse la zim me bzhugs pa las gtor bsngos mi gnang 'dug pa skabs mtshams shig nas zhabs bskul zhus par bsdus pa zhig mdzad/ gsol ba zhus pas kyang cung zad tsam las mi bzhes par sngar ltar bzhugs/ de bar phyag g.yog byings khal bkal nas sngon la song gsol dpon blo gsal can la da dung ja skol gsungs gsol ja sbyor gnyis tsam gyi bar bzhugs nas phebs/ de'i tshe jo mo mkha' reg gi gangs ri'i rtser sprin dkar po chen po zhig lho phyogs su skyes byung ba'i steng nas ayon rin po che sku mi tshad las cung che ba za hor gyi sku chas sprad pa na bza'i gong len la stag lpags gsar pa'i mu 'gril yod pa/ phyag g.yas na gser gyi rdo rje dang g.yon na ka pA la bdud rtsis gang ba bsnams pa zhabs rdo rje skyil krung du bzhugs pa gsal bar gzigs nas rim bzhin bsti gnas su phebs so/ /gnyis spangs bla ma'i lung bzhin bu ston rje'i/ /seng khrir phebs la 'dod khams dbang mo yis/ /nyer bskul srid mthar bstan pa 'phel ba'i sgra/ /rab dkar bkra shis g.yas 'khyil dung las sgrog /'jig rten gsum dbang lha chen nyi ma'i bus/ /rdo rje'i rwa rtse spu gri ltar rno ba/ /khyod drung pad 'dab rjes 'gro'i 'jam mnyen gyi/ /reg byar lta la mkha' ngos rgyu skar 'khrigs/ /mkhan gzugs lha gral sgrig pa'i las dbang bcud/ /myangs pas srog ldan sbyin skyes mched min pa/ /lha sngags ye shes gser sgong mngal 'dzin pa'i/ /mes po blo gsal rgya mtsho yab sras tsam/ /