[A:489]snang ba'i phyir ro/ /de yang sha gcod par mdzad pa ni/ byis pa'i dus na'ang nang cha dang / sha rjen zos pa mi dran zhes gsung zhing / che bar gyur nas dgung lo bdun phan chad sha dang khrag la sogs pa gzigs pa tsam gyis zhag mang por gsol dngas 'gags/ rab tu byung ba rnams kyi 'tsho ba ma yin zhing / sangs rgyas kyis kyang za bar ma gnang bar dgongs nas/ dgung lo bcu gsum pa la sha bcad nas/ phyis sha'i dri tsam gyis kyang sku khams la gnod par snang ngo / /rig pa 'dzin pa'i sdom pa ni/ bla ma rnams nas/ gsang sngags rdo rje theg pa'i rgyud so so nas bshad pa ltar du/ mkhas shing grub pa thob pa rang rang gi lugs las 'byung ba bzhin smin byed kyi dbang bod na yod pa rnams dang / de dag la brten pa'i bskyed rdzogs kyi lam cha lag dang bcas pa srol so so ma 'dres par so sor gsan cing thugs su chud par mdzad pa yin la/ ji ltar gsan tshul gsan yig rgya mtshor blta'o/ /'dir rags pa tsam brjod na/ thog mar chos rje ye shes rgyal mtshan pa'i drung du/ rgyud sde bzhi dang 'brel ba'i dbang bskur gsan nas/ rig 'dzin sngags kyi sdom pa rnam par dag pa dang ldan par mdzad pa yin te/ de yang bsnyen par rdzogs ma khad/ gur rigs bsdus kyi dkyil 'khor du slar yang dbang bskur bskyar te tshar gcig gsan no/ /de'i tshe yab yum shin tu phyug pas dkyil 'khor rin po che las bzhengs so/ /de las bla med kyi gsang ba 'dus pa mi bskyod pa/ ye shes zhabs lugs/ gshin rje'i gshed dmar po lha lnga/ lha bcu gsum ma/ dpal kye rdo rje man ngag lugs/ bdag med ma/ gur rigs bsdus/ bde mchog lo nag dril gsum/ dril bu lha lnga/ sgrol ma lha bcu bdun ma/ dus kyi 'khor lo rnams kyi dbang gsan/ gzhan yang yo ga rdor dbyings/ /'jam dpal gsang ldan/ /kun rig rtsa ba'i dbang rnams gsan/ bya spyod la tshe