[A:༤༩ན] ཚོགས་ཀྱང་གྲངས་དང་ཚད་མེད་པ་ཞིག་བྱུང་བ་ཡིན་ལ། རྗེ་འདིས་ཆོས་སྐྱོང་རྣམས་གཟིགས་ཚུལ་མཚོན་པ་ཙམ་ཞིག་བརྗོད་ན། ལན་གཅིག་དུས་གཏོར་ཞིག་གི་དུས་སུ་སྔར་བས་ཟིལ་ཆེ་ཞིང་། ཞབས་འབྲིང་བ་རྣམས་སྐྱི་གཡའ་བར་བྱུང་ཞིང་། དེའི་སྲོད་ཀྱི་དུས་ཙམ་ན་སྒྲ་ཆེན་པོ་དང་། འཕྲལ་དུ་སྤོས་གཏོང་མཁན་མེད་ཀྱང་ཆོས་སྐྱོང་གི་སྤོས་སྦྱོར་གྱི་ངད་ཆེན་པོ་ལྡང་བ་དང་གཟི་བྱིན་ཤིན་ཏུ་ཆེ་བའི་ངང་ནས། རྗེ་འདི་ཉིད་ཀྱི་སྐུ་མདུན་གྱི་ནམ་མཁའ་ལ་གུར་གྱི་མགོན་པོ་པད་ཉི་རོའི་གདན་ལ་སྐུ་མདོག་སྔོན་པོ་ཞབས་གཡས་ཅུང་ཟད་ཕྱེད་ཀྲུང་གི་ཚུལ་གྱིས་རྟིང་པ་ལ་ཞབས་གཡོན་གྱི་བྲང་གཏད་པ། ཕྱག་གཉིས་གྲི་ཐོད་སྟེང་འོག་ཏུ་འཛིན་པ། དབུ་སྐྲ་སེར་པོ་གྱེན་དུ་ལངས་པ་ལ་ཐོད་སྐམ་ལྔའི་དབུ་རྒྱན་ཅན། སྟག་ལྤགས་ཀྱི་ཤམ་ཐབས་དང་རིན་པོ་ཆེའི་རྒྱན་གྱིས་བརྒྱན་པ། སྐུ་གཡོན་དུ་ཅུང་ཟད་འགྱིང་ཞིང་མེའི་རྒྱབ་ཡོལ་དང་བཅས་པ་