[A:48a]yis/ /sgrub na mi 'grub gang yang med/ /dka' yang brnag pa ma dor na/ /ri bo rnams kyang thal bar rlog /zer bas ngas yun thung 'dug bsam ste slar lo gsum bsgrubs so/ /der yang rtags med nas don pas chu thigs kyis brag zad pa mthong nas slar lo gsum bsgrubs/ yang rtags med nas 'thon pas phug ron gyi sgros bshud pas brag zad pa mthong / der yang lo gsum ste bcu gnyis sgrub bo/ /der yang mtshan ma ma byung nas skyo ste 'thon nas phyin pa na/ khyi mo ro smad 'bus shig la ro stod zug cing za ba gcig mthong nas snying rje lhag par bskyed de bsal na 'bu 'chi/ ma bsal na khyi mo 'chi bar snang bas rang gi lus las sha bcad de 'bu zar gzhug snyam nas grong khyer a tsanta zhes bya bar phyin te gseg shang gta' mar bzhag nas gser gyi spu gri g.yar te rang gi lus las sha bcad/ lag pas blangs na shi yis dogs/ spyan btsum ste ljags kyis len snyam pa dang khyi med par rje btsun byams pa 'od sgor re bzhugs pa mthong nas yus te/ kye ma yab gcig bdag gi skyabs/ /ngal brgyas 'bad kyang 'bras ma mchis/ /ci phyir char sprin rgya mtsho'i dpung / /gdung bas bsregs te skom tshad 'bab/ /bdag gis de tsam bsgrubs kyang rtags ma byung na thugs rje re chung zhes 'khangs pas/ rje btsun gyis/ lha'i rgyal pos char phab kyang / /sa bon mi rung mi 'khrungs ltar/ /sangs rgyas rnams ni byon gyur kyang / /skal pa med pas bzang mi myong / /nga dang po nas yongs te khyod rang gi sgrib pas ma mthong la/ da lta snying rje chen po skyes pas sgrib pa dag nas mthong ba yin/ yid mi ches na khyod rang phrag par khur la ston cig gsungs nas khrom gyi dbus su phyin te bstan pas sus kyang ma mthong bas yid ches/ khyod ci 'dod gsungs pa la theg chen dar bar zhu 'tshal byas pas/ nga'i chos gos la 'jus shig gsungs nas 'jus te dga' ldan du byon/ lha'i gro skad du mi lo lnga bcu'am lnga bcu rtsa gsum du bzhugs par 'chad/ sa sde'i sna mchan las/ zla ba drug bzhugs te gsan zhes byung ngo / /der yum gyi mdo rnams dang / rnal 'byor spyod pa'i sa chen po dang / theg chen gyi mdo sde mang po dang byams pa'i chos lnga gsan/ mi yul du byon nas rnal 'byor spyod pa'i sa chen po la sogs pa theg chen gyi sde snod gsum gtan la 'bebs pa'i bstan bcos sa sde lnga/ sdom pa rnam pa gnyis sogs du ma mdzad/ slob dpon des chos kyi rgyun gyi ting nge 'dzin brnyes te/ sa'i stod 'grel las/ 'jig rten kun la phan