[A:36a]las da res mu stegs kyi rnal 'byor mas bar du bcad pas mchog gi dngos grub ma thob/ skye ba phyi ma zhig rgya gar gyi yul dbus gra bye lar skyes nas mchog gi dngos grub thob par bya'o zhes grags te mi snang ngo / /phyi ma ni mai tri pa'o/ /de lta bu 'bar ba'i gtso bo'am spyod 'chang mgon po'am rgyal ba'i lhas gnas brtan chen po dpal ldan chos skyong dang zhi ba lha la sogs pa'i mkhan po mdzad do/ /slob dpon 'phags pa bcud len grub pas ma grongs/ shAkya mai tri ni grongs te singga la'i rgyal po'i ldum ra'i nang du mtsho yod la/ de la padma mang po yod pa nyin kha phye nub zum mo/ /padma gcig nyin yang kha ma phye bar ldum ra gnyer pas rgyal po la bsnyad do/ /rgyal pos de la gnyer kha cher gyis shig ces gdams te nang re bzhin lta'o/ /de nas zhag bdun lon pa'i nyin padma kha phye ste nang na khye'u shin tu mdzes pa lo brgyad pa'i tshod cig zil ba khrom me 'dug ste/ 'di la mngal gyi lag pas reg par mi rigs pas panytsma li ka'i gos kyi khung du gtams te spyan drang ngo zer/ lam khar khye'u na re 'phags pa klu sgrub gang na bzhugs zer/ da rung 'dzam bu gling na bzhugs/ sa phyogs 'di na mi bzhugs byas so/ /de nas rgyal pos sras su bzung ste yun ring zhig bskyangs pas skyed kyang shin tu drag go /de nas yab yum la klu sgrub kyi spyan sngar rab tu byung bar nan gyis zhus pas gnang ste/ dpal gyi rir byon te bsnyen par rdzogs/ mgon po ngag gi dbang phyug bsgrubs pas rang dang gzhan gyi gzhung lugs thams cad la mkhas pa chen por gyur to/ /de'i tshe rgya gar lho phyogs kyi bram ze sa barYa ma byi ta kra ya zhes pa la bu ma ti tsi tra zhes bya ba skyes te/ de chung ngu'i dus nas mas ci bsgo ba nyan/ ma'i bran bzhin byed pas ma khol/ der byis pa de mu stegs zhi ba'i lugs kun shes par byas nas/ rgya gar nub phyogs su song ste dbang phyug chen po'i lha rten gyi rtsar sa sde btsugs nas phyogs las rnam par rgyal ba'i rtsod pa'i mchog ma longs pa de srid mi ldang bar dam bcas nas rten de'i rtsa na rdzing bu zhig 'dug pa der nyal nas zhag bdun du dbang phyug chen po'i sngags bgrangs pas zhag brgyad 'gro ba'i nangs par zhal mthong / khyod dngos grub ci 'dod zer/ des bdag ni phyogs las rnam par rgyal ba'i rtsod pa zhu lags so zhes brjod pas/ ngas mngal skyes kyis mi thub par byin gyis brlabs kyi/ rdzus skyes byung na shin tu thub dka'o/ /de'i rtsar tshangs pa bkug nas