[A:302a]yang khyi nag pha jo zer ba'i mgon khyi zhig yod pa'i mgul du yi ge btags de btang bas gar brdzangs par slebs te/ tshur yig lan yang de kha la bskur bas chog de thams cad chos skyong gi sprul pa yin/ dus rgyun du'ang gsung bcad mdzad de bsnyen sgrub rang mdzad/ de'i dbang gis nus pa rdzu 'phrul thogs med mnga'/ 'byung ba la rang dbang thob pas zhu mkhan brag tu bla ma sgrub pa mdzad pa'i tshe brag la phyag gis 'jus pa'i rjes/ ra lung du sbyin sreg mdzad pa'i rdo la phyag rjes/ ra lung gi sgom sde la chu gnod zhi ba'i phyir zhabs rjes/ stag ri'i dben gnas rgyun du brtan pa'i phyir dang chos rdzong sogs te zhabs rjes bdun bzhag stag rir gsang spyod la byon pa na/ bu mo rus pa'i rgyan gyis brgyan pa gsum byung nas/ khyod rgya gar yul du 'byon tsa na/ /nged mi 'gyur bu mo spun gsum gyis/ /lam byang chub mchog tu sems bskyed pa/ /de thugs la gsal lam lo tsA ba/ /zhes zer ba'i mod la rje mar pa 'khrungs pa'i skabs shin tu gsal por dran/ chos rje'i slob ma phyi tshar rnams kyi gdam ngag rdzogs par mdzad/ nyid kyi slob ma 'gro sgom zhig pos lho kha bzhi dbang du bsdus/ ra lung gi phyi rten bzhengs pa'i ganydzyi ra bskyon pa la stag ri nas rdzu 'phrul gyis rkyang la chibs te byon/ der rab tu gnas pa'i dus dkar brgyud kyi bla ma rnams dngos su byon pa gzigs/ drug cu re gcig la zhi bar gshegs so/ /gzhon nu sengge gcen lha btsan gyis sras gnyis byung ba'i che ba yin/ chung ba rin chen dpal lo/ /dgung lo brgyad pa la chos rje'i drung du rab tu byung / rtsa gsum pa la bsnyen par rdzogs/ so gsum pa la gdan sar byon/ rje khu dbon gnyis kyi gdam ngag bum pa gang byo yod/ rtsa rlung gi nus pa che/ 'di'i ring la lho 'brug thub/ 'brug la gling log byung / dgung lo drug cu re bdun pa la gshegs/ zhal slob kyang grub thob g.yu mo che ba la sogs thon// slob dpon rin dpal gyi sras po nyi ma sengge bcu gcig pa la chos rje gzhon nu la rab tu byung / rtogs pa mchog tu gyur/ bcu drug pa la gdan sar phebs dgung lo so bdun pa la gshegs/ sengge shes rab dbon stag gi sras su mched gnyis 'khrungs pa'i gcen po/ dgung lo drug nas ting nge 'dzin rang 'khrungs/ bcu gcig pa la chos rje gzhon nu la rab tu byung /